पूर्व उपप्रधानमन्त्री अधिकारी अस्वस्थ, अस्पताल भर्ना
काठमाडौं, २८ पुस । पूर्व उपप्रधानमन्त्री तथा नेकपाका नेता भरतमोहन अधिकारी अस्पताल भर्ना भएका छन् ।
छातीमा सङ्क्रमण देखिएपछि ललितपुरको भँंसेपाटीस्थित मेडिसिटी अस्पतालमा गत सोमबार भर्ना गरिएको उनका स्वकीय सचिव महेन्द्र विष्टले जानकारी दिए ।
चिसोले गर्दा अधिकारीको छातीमा सङ्क्रमण भएको उनले बताएका छन् । पूर्व अर्थमन्त्री समेत रहेका अधिकारीलाई शुक्रबारदेखि स्वास्थ्यमा सुधार आएपछि सामान्य बेडमा सारिएको छ ।
८३ वर्षीय अधिकारीलाई विगत एक वर्षदेखि स्वास्थ्यमा समस्या आएपछि मेडिसिटी अस्पतालमा पटक पटक उपचार भइरहेको छ । उनको डा. राजेन्द्र रिजालको समूहले स्वास्थ्य उपचार गरिरहेको छ ।
