कोइराला परिवारको भित्री कुरा
काठमाडौं, २ माघ । ‘सुजाता र सशांकले साथ दिएको देखिएन । रामचन्द्र र शेरबहादुरले पनि सभापतिमा उठोस् भन्ने चाहेका छैनन् । सशांकले कुन पदमा उठ्ने भनेर शेरबहादुरसँग बार्गेनिङ गरे जस्तो छ । यस्तो स्थितिमा तपाईं उठ्छु, जित्छु भन्दै हुनुहुन्छ । कुरा अलिक मिल्दो भएन । कम्तिमा सशांकजति त तपाईंसँग हुनुपर्यो नि !’
अघिल्लो शुक्रबार सप्तरीको कञ्चनपुरस्थित पुराना नेता हेमराज तातेडको घरमा पुगेका शेखर कोइरालालाई कार्यकर्ताहरुले यिनै प्रश्न सोधेर दिक्क लगाएपछि उनले मुख खोले, ‘कोही उठ्यो, उठेन, कसैले साथ दियो, दिएन भनेर हेर्दिनँ । तर, आउँदो महाधिवेशनमा म नेपाली कांग्रेसको सभापतिको उम्मेदवार हुँ ।’
त्यसो त, यसअघि केन्द्रीय सदस्यमा उठ्दा सबभन्दा बढी मत ल्याउने उनै थिए । दोस्रो बढी मत खुमबहादुर खड्का र त्यसपछि विश्वप्रकाश शर्माहरुले ल्याए । शेखरको विश्लेषण थियो, ‘रामचन्द्रले शेरबहादुरलाई सक्दैनन् । तर, रामचन्द्र जसरी शेरबहादुरले आफूलाई माइनस गरेका थिए, त्यसको बदला लिन चाहन्छन् । अहिलेसम्म उनले आफूलाई सेन्टरमा राखेर हेरिरहेका छन् । तर, रामचन्द्रबाट पार लाग्ने अवस्था छैन ।’
एक जना फोरमवालाले सोधे, सशांकको कुरा के हो त ? शेखरले भने, ‘तिमीले उसलाई नचिनेको हो र ? सशांक शेरबहादुरको बुई चढेर पार्टीको पोजिसनमा बसिरहने सोचाईमा छ । तर, त्यहाँबाट एक दिन फर्किन्छ ।’ उता, सुजातालाई क्यान्सरका कारण डाक्टरले घरबाट एक रात पनि कतै नजानु भनेका छन् ।
केही समयअघि कोइरालाका सन्तान एक ठाउँमा देखाउन उनले खानपिन आयोजना गरेको प्रचार भए पनि रोगले च्याप्दै जाँदा निकटस्थसँग बसेर खाने इच्छा मात्र राखेकी थिइन् । त्यसमा पनि राजनीति भयो, कोइरालाका सन्तानको नाममा । शेखरको मान्यता छ, ‘कांग्रेसले सरकारको गलत काम प्रतिपक्षीको रुपमा हाइलाइट्स गर्ने मात्रै हो, हामी सरकार फेर्न सक्दैनौँ ।’
उनले केही दिनअघि प्रचण्डसँग भेटेको पनि सुनाए । भने, ‘जति नै गलत काम ओलीले गरे पनि प्रचण्डले साथ दिने भएका छन् । जसले गर्दा ओलीको टाउकोमा अपजसको पोको ठूलो हुँदै जाओस् । कुनै डिफेन्सिभ काम गर्ने उनको चाहना छैन ।’ जनआस्था साप्ताहिकबाट
