चालकले ‘बन्द’ छल्न खोज्दा कालीगण्डकीमै जीवनबाटै विदा भए सात सर्वसाधरण (तस्विरसहित)
पर्वत, ३ माघ । बेनीस्थि बस काउण्टरबाट टिकट काटेर बस हँसमुख मुद्रामा बस चढेका पर्वत जलजला गाउँपालिका–८ का टीके परियार र सेतीमाया दम्पतिलाई के थाहा कालीगण्डकी कट्न पाइदैन भनेर ।
म्याग्दी पाखापानी–१ का २१ वर्षीय राजेश पुनलाई पनि बेनी बस काउण्टरमा आफ्नो जीवन विदाइकै टिकट काटिरहेको के थाहा ? बेनीबाट नारायणगढ चल्ने ग १ ख ६१०८ नम्बरको बसको टिकट काटेर चढेकामध्ये सात जना कालीगण्डकी कट्नै पाएनन् । उनीहरुले काटेको टिकट जीवन विदाइकै टिकट बन्यो ।
विहान राम्रोसँग चिया खाजा पनि खान नपाई बस चढेका यात्रु विहान ८.१५ बजे पर्वत कुश्मा नगरपालिका–१ को मालढुङ्गामा सडकबाट ७० मिटर तल कालीगण्डकीको बगरमा खस्दा सात ४ जना तत्कालै जीवनबाट विदा भए भने तीन जनाको उद्धारपछि उपचारकै क्रममा ज्यान गयो । दुर्घटनामा ३४ जना घाइते भएका छन् । दुर्घटना तीब्र गतिकै कारण भएको अनुमान उद्धारमा खटिएका प्रहरीको अनुमान छ ।
मध्यपहाडी लोकमार्गमा अहिले सडक स्तरोन्नती भइरहेकाले बिहान १० बजेदेखि बेलुकी ४ बजेसम्म गाडी गुडाउन रोक लगाइएको छ । चालकले १० बजेभित्र नै सडक पार गर्न तीव्र गतिमा गाडी चलाउँदा दुर्घटना भएको हुन सक्ने प्रहरीको अनुमान छ । २५ सिट क्षमताको बसमा बेनी बस काउण्टरबाट १४ जनाले टिकट काटेर चढेको र बीच बाटोबाट चढेका गरी ४० को हाराहारीमा यात्रु रहेको प्रहरीको प्रारम्भिक अनुमान छ ।
चालकले सडक ‘बन्द’ छल्न खोज्दा अकल्पनीय रुपमा सात जना सर्वसाधरणले जीवनबाटै विदा लिनु परेको हो । मृत्यु भएका सातमध्ये चार जनाको सनाखत भएको छ ।
दुर्घटनामा परी मृत्यु हुनेमा म्याग्दी पाखापानी–१ बस्ने २१ वर्षीय राजेश पुन, पर्वत जलजला गाउँपालिका–८ बस्ने ४० वर्षीया सेती परियार, उनका पति ५० वर्षीय टिके परियार र बागलुङ नगरपालिका–४ की ४८ वर्षीया शान्ति केसीको सनाखत भएको पर्वत जिल्ला प्रहरी कार्यालय पर्वतले जनाएको छ । मृत्यु हुने अन्य दुई पुरुष र एक महिला सनाखत हुन बाँकी रहेको छ ।
सो दुर्घटनामा घाइते भएका ३० मध्ये २० लाई पोखराको मणिपाल शिक्षण अस्पताल र दुईलाई हेलिकप्टरमार्फत काठमाडौँस्थित ग्राण्डी अस्पताल पठाइएको पर्वतका प्रहरी नायव उपरीक्षक भुवनेश्वर तिवारीले जानकारी दिएका छन् ।
अन्य आठ जना घाइतेको बाग्लुङ अञ्चल अस्पतालमा उपचार भइरहेको छ । बसका चालक पनि घाइते रहेको र सहचालक फरार रहेको जनाइएको छ । अहिलेसम्म घाइतेको विवरण आइसकेको छैन । प्रहरीले तीब्र गतिकै कारण दुर्घटना भएको हुनसक्ने अनुमान गर्दै थप अनुसन्धान भइरहेको जिल्ला प्रहरी कार्यालय, पर्वतले जनाएको छ ।