डा. केसीलाई काठमाडौं ल्याइयो, शिक्षण अस्पतालको आइसियुमा उपचार हुँदै
काठमाडौं, ४ माघ । इलाममा अनसनरत डा. गोविन्द केसीलाई काठमाडौँ ल्याइएको छ । डा. केसीको स्वास्थ्य स्थिति चिन्ताजनक भएपछि बिहीबार राती नै काठमाडौं ल्याइएको हो ।
विपी कोइराला स्वास्थ्य विज्ञान प्रतिष्ठान धरानबाट साँझ आइपुगेको टोलीले केसीको स्वास्थ्य परिक्षण गरि अवस्था चिन्ता जनक भएको र अन्यत्र जान सुझाव दिएपछि रातीनै डा. केसीलाई काठमाडौं ल्याइयो ।
केसीलाई राति नै महाराजगन्जस्थित त्रिवि शिक्षण अस्पताल भर्ना गरिएको छ । उनको अस्पतालको आइसियु कक्षमा उनको उपचार भइरहेको छ । थप उपचार पछि उनले आराम महसुस गरेको उपचारमा संलग्न डाक्टरहरुले बताएका छन् ।
अहिले आइसियु कक्षको सबै बत्ति निभाएपछि डाक्टर केसी निदाएका छन् । डाक्टर केसी निदाएकाले कसैलाई पनि भेटघाट गर्न दिइएको छैन ।
डा. केसी चिकित्सा शिक्षा सुधारको माग गर्दै गत पुस २५ देखि इलाममा १६ औं अनसनमा बस्दै आएका थिए । अनसनमा रहदा स्वास्थ्य जटिल बन्दै गएपछि डा. केसीलाई गत सोमबार इलाम अस्पतालमा भर्ना गरिएको थियो ।
डा. केसीलाई भेट्न र उहाँका माग प्रति ऐकेबद्धता जनाउन चिकित्सा शिक्षा सम्बन्धी राष्ट्रिय नीति तर्जुमा गर्न गठित उच्चस्तरीय कार्यदलका संयोजक केदारभक्त माथेमा, पूर्व प्रधान न्यायधिश शुशिला कार्की र पूर्व सभामुख दमननाथ ढुंगाना बिहीबार साँझ इलाम आएका थिए ।
यो पनि पढ्नुहोस्
चिकित्सा शिक्षा विधेयक र डा.केसीका माग : भ्रम र यथार्थ
