फिक्कलमा र्याफ्टिङको रोमाञ्चकता {फोटोफिचर-भिडियो}
सिन्धुली, ४ माघ : संघीय राजधानी काठमाडौंबाट करिब चार घन्टाको सडक यात्रापछि पुगिन्छ, फिक्कल गाउँपालिकाको केन्द्र रहेको खाङसाङ बेसी । पारी ओखलढुङ्गाको अग्ला–अग्ला डाँडाहरु, माथि ७ हजार ७ सय ७१ फिट अग्लो फिक्कल डाँडा । सुनकोशीको किनारमा लमतन्न बसेको छ, खाङसाङ बेसी ।
काठमाडौंबाट बिपि राजमार्ग हुँदै खुर्कोट–घुर्मी मध्यपहाडी लोकमार्गको १ सय ५७.२ किलोमिटर सडक यात्रा निकै रोमञ्चक हुन्छ । भोटेकोशी, तामाकोशी लिखुलाई दायाँ पारेर गएको यो सडक खण्डको यात्रा आफैमा रमाइलो छ ।
भौतिक पूर्वाधार बिकासको हिसाबले फिक्कलबासीहरु भने आफूलाई सिन्धुलीको कर्णालीबासी सम्झिन्छन् । तर, प्राकृतिक सम्पदाको दृष्टिले यो क्षेत्र सिन्धुलीको लागि कर्णाली होइन राजधानी जस्तै छ । फिक्कल गाउँपालिकामा पर्ने महादेवडाँडा, सुम्नाम पोखरी, खोलागाउँ, खाङसाङ, सोल्पाठाना र रत्नावती सबै गाउँहरु प्राकृतिक र सांस्कृतिक हिसाबले सम्पन्न छ ।
तर, ती सम्पदाहरुको उपयोग नहुँदा फिक्कलबासीहले अझै पनि आफूलाई सिन्धुलीको कर्णालीबासी सम्झिरहेका छन् । तिनै प्राकृतिक सम्पदाहरुसँग सबैको साक्षत्कार गराउनका लागि अहिले फिक्कलमा महोत्सव चलिरहेको छ । फिक्कल गाउँपालिकाको आयोजनामा माघ २ गतेदेखि सुरु भएको महोत्वस ७ गतेसम्म चल्नेछ ।
सुनकोशीमा र्याफ्टिङ
सञ्चार तथा सूचना प्रविधिमन्त्री गोकुलप्रसाद बाँस्कोटाले उद्घाटन गरेको महोत्सवको सबैभन्दा आकषर्ण रहेको छ, जलयात्रा अर्थात् ‘र्याफ्टिङ’ । महोत्सवमा खाङसाङदेखि झगरेबेसीसम्म करिब एक घन्टाको ‘र्याफ्टिङ’ गराइएको छ । आवश्यकता अनुसार लामो समयको ‘र्याफ्टिङ’ पनि गराउन सकिने रिभर गाइड खुम रानामगरले बताए । उनका अनुसार फिक्कलको यो क्षेत्र ‘र्याफ्टिङ’लागि उपयुक्त क्षेत्र हो ।
सांसद गणेशकुमार पहाडीले अब क्षेत्रमा व्यावसायिक रुपमा ‘र्याफ्टिङ सञ्चालन गरिने जानकारी दिए । यो क्षेत्रलाई नेपालकै पर्यटकीय गन्तव्य बनाउनका लागि सांसद पहाडी कम्मर कसेर लागेका छन् ।
पर्यटन मन्त्रालय र सरोकारवाला सबै निकायहरुमा यसको लागि आफूले पहल गरीरहेको पहाडीले बताए । फिक्कलको समृद्धिमा पर्यटनलाई जोड्ने प्रयास रहेको उनको भनाई छ ।
हेर्नुहोस् भिडियो :-
यसैगरी यो क्षेत्रमा प्याराग्लाइडिङ पनि सुरु गरिएको छ । ओखलढुङ्गाको टोड्के डाँडोबाट उडान गरेर खाङसाङस्थित सुनकोशी किनारमा अवतरण गर्ने गरी प्याराग्लाइडिङ सुरु गरिएको हो । अब यो क्षेत्रमा जाने पर्यटकले र्याफ्टिङ र प्याराग्लाइडिङ दुबैको आनन्द लिन सक्नेछन् ।
फिक्कलको डाँडाबाट सुन्दर हिमाली श्रृखलासँगै पूर्वका पहाडी जिल्लाहरु पनि हेर्न सकिन्छ । सूर्योदय र सूर्यास्तको दृष्य अत्यन्तै मनमोहक हुने फिक्कल गाउँपालिकाका उपाध्यक्ष पार्वती सुनुवार बताउँछिन् । भनिन्, ‘सूर्योदय र सूर्यास्त हेर्नका लागि यो सबैभन्दा उयुक्त ठाउँ हो ।’
फिक्कलको उत्तरतिर रहेको महाकाली देवीस्थान नजिकमा रहस्यमय प्राकृतिक गुफाहरु छन् । आसपासका वन जंगलमा बहुमूल्य जडिबुटी पाईने स्थानीय बासिन्दासमेत रहेका पत्रकार उज्ज्वल पहाडीले जानकारी दिए ।
