‘घुस’ असुल्ने एसपीका घुमुवा तानिए मकवानपुर
काठमाण्डौं : पर्साका प्रहरी प्रमुख गणेश रेग्मीपछि घुमुवा राखेर आर्थिक लेनदेन गरेको अभियोगमा मकवानपुरका एसपी विकास खनाल पनि मुछिएका छन् ।
मकवानपुरका प्रहरी प्रमुख एसपी खनालले सिभिलमा खटाएका प्रहरी नायब निरीक्षक (सई) बुद्धि चौधरीलाई ब्यापारीलाई धम्क्याएर पैसा असुली गरेको आरोपमा प्रहरी प्रधान कार्यालयले गणमा हाजिर गराएको छ । उनले हेटौंडादेखि चितवनसम्मका ब्यापारीसँग पैसा असुली गरेको उजुरी परेपछि उनलाई प्रहरी प्रधान कार्यालयले तानेको स्रोतले नयाँपेजलाई बताएको छ ।
स्रोतका अनुसार एसपी खनालले अतिरिक्त आम्दानीका लागि परिचालन गरेका घुमुवा सई चौधरीलाई प्रहरी प्रधान कार्यालयले गत हप्ता आइतबार बयानका लागि बोलाएर १ नम्बर गणमा हाजिर गराई छानबिन गरिरहेको छ । चौधरीलाई प्रहरी प्रधान कार्यालयको उजुरी छानबिन महाशाखाले एक हप्तादेखि दैनिक बयान लिइरहेको छ । सई चौधरी यसअघि चितवनमा हुँदा पनि विवादमा तानिएका थिए ।