नर्सहरुको आन्दोलन फिर्ता, माग पूरा गर्ने सहमति
काठमाण्डौं, ५ माघ : पेसागत सुरक्षाको माग राख्दै नौं दिनदेखि आन्दोलनमा रहेका नर्सहरुको विरोधका सबै कार्यक्रम फिर्ता भएको छ ।
११ बुंदे मागसहित नौ दिनअघिदेखि आन्दोलनमा उत्रेका नर्स र सरकारबीच सहमति भएको छ । बिहान ११ बजेदेखि स्वास्थ्य मन्त्रालयमा करीब आठ घण्टा चलेको वार्तामा नर्सका सबै ११ वटै मागमा सहमति भएको स्वास्थ्य मन्त्रालयका प्रवक्ता श्रीकृष्ण गिरीले जानकारी दिएका छन् ।
सहमतिसँगै नर्सहरुले आन्दोलनका सबै कार्यक्रम फिर्ता लिएका छन् । नर्सहरुको ११ बुंदे मागहरुमध्ये पहिलो बुंदामा मानव अङ्ग प्रत्यारोपण केन्द्रबाट निकालिएका नर्सलाई पुनर्बहाली गर्ने भन्ने थियो । निष्कासित दुई जना नर्सलाई ३ महिनासम्मका लागि पुनर्वहाली गर्ने र उनीहरुलाई साउनयता तलबको ७५ प्रतिशत रकम दिने सहमति भएको प्रवक्ता गिरीले बताएका छन् । त्यस्तै अर्की एक नर्सलाई करारमा नियुक्ति गर्ने सहमति भएको छ ।
पारिश्रमिक वृद्धिका सम्बन्धमा कार्यदल बनाएर त्यसबाट प्राप्त सिफारिसका आधारमा अघि बढ्ने निर्णय भएको जनाइएको छ । आन्दोलनरत नर्सहरुको माग पूरा गर्न स्वास्थ्य मन्त्रालयले प्रमुख विशेषज्ञ डा. विनोदमान श्रेष्ठको संयोजकत्वमा बुधबार वार्ता समिति गठन भएको थियो । समितिका सदस्यमा डा. गुणराज लोहनी, महेन्द्र श्रेष्ठ, नर्सिङ प्रशासक कल्पलता सुब्बा थिए । यस्तै नर्सिङ संघबाट उपाध्यक्ष गंगा थापा, महासचिव लक्ष्मी केसीसहितको टोलीले वार्ता गरेको थियो ।