विपन्नलाई बाँडिने न्यायो कपडामा पनि भ्रष्टाचार !
डडेल्धुरा, ८ माघ : डडेल्धुरामा गरीब नागरिकलाई बाँडिने जाडोको न्यानो कपडा खरिदमा पनि भ्रष्टाचार भएको छ । डडेल्धुराको परशुराम नगरपालिकामा न्यानो लुगा खरिदमा अनियमितता भएको पुष्टि भएको हो । ९ लाख रुपैंयाँको लुगा खरिदमा ३ लाख २० हजार ४१९ रुपैयाँ अनियमितता भएको छानबिन समितिले ठहर गरेको हो ।
नगर कार्यपालिका बैठकले ज्येष्ठ नागरिकका लागि न्यानो लुगा खरिद गर्दा अनियमितता गर्ने परशुराम नगरपालिकाका सूचना अधिकारी जगन्नाथ जोशीमाथि कार्वाहीको माग गरेको छ । बैठकले अनियमितता गरेको रकम सोधभर्नासहित कार्वाही गर्न नगर प्रमुख भिमबहादुर साउदलाई माग गरेको छ ।
नगरपालिकाले यसअघि घटना छानविनका लागि वडा अध्यक्ष तथा कार्यपालिका सदस्य केशव बोहराको संयोजकत्वमा समिति गठन गरेको थियो । मुख्य तीन वडाका राजनीतिक दलको प्रतिनिधित्व रहने गरी समितिमा नेकपा एमालेबाट गणेशबहादुर सिंह, नेपाली कांग्रेसबाट कैलाश कुमार, पाण्डे, नेकपा माओवादी केन्द्रबाट शेरसिंह माल रहेका थिए ।
