राखेप च्याम्पियनसिपकाे उसुमा १५ स्वर्ण जित्दै आर्मी पहिलो
काठमाडौं, माघ ८ गते : नेपाल आर्मी राखेप च्याम्पियनसिपअन्तर्गत १३ औँ राष्ट्रिय उसु प्रतियोगितामा पहिलो भएको छ । इटहरीमा भएको प्रतियोगितामा आर्मीले १५ स्वर्ण, तीन रजत र सात कांस्य जित्दै पहिलो भएको हो । यसै गरी एपीएफ आठ स्वर्ण, तीन रजत र एक कांस्य जित्दै दोस्रो, नेपाल प्रहरी एक स्वर्ण, चार रजत र दुई कांस्य जित्दै तेस्रोे भएकाे छ ।
सान्सौं र थाउलोमा गरी २५ स्पर्धा समावेश प्रतियोगितामा बाँकी १ स्वर्ण मध्यमाञ्चलले प्राप्त ग¥यो । मध्यमाञ्चलले थप २ रजत र ९ कांस्य पनि जित्यो । अन्तिम दिन थाउलोको महिला नाना छ्वान अलराउन्डमा १२ औँ सागकी स्वर्णधारी आर्मीकी निमा घर्ती मगरले स्वर्ण जितिन् । निमाले १५.६५ अङ्क जोडिन् । पूर्वाञ्चलकी अनु राई (१४.२५ अङ्क) दोश्रो तथा मध्यपश्चिमाञ्चलकी सुर सोती (१२.९५ अङ्क) तेश्रो भए ।
सोही स्पर्धाको पुरुषमा एपीएफका युवाराज तामाङ (१७.९५ अङ्क) ले स्वर्ण, मध्यपश्चिमाञ्चलका दीपक हमाल (१७.८० अङ्क) ले रजत र आर्मीका विशाल थापा सिन्जाली (१६.३५ अङ्क) ले कांस्य जिते ।
पुरुष छान छ्वानमा आर्मीका विजय सिन्जाली पहिलो भए । उनले ८.७० अङ्क वटुले । दोश्रो भएका एपीएफका कुमार सिन्जाली मगरले ८.६० तथा तेश्रो भएका मध्यमाञ्चलका सञ्जयराज पुटुवारले ७.७५ अङ्क बनाए । उक्त स्पर्धाको महिलामा आर्मीकी सुस्मिता तामाङ (८.५५ अङ्क), मध्यमाञ्चलकी जुनु स्याङबो लामा (६.८० अङ्क) र सुदूरपश्चिमाञ्चलकी एलिशा खाती (६.५५ अङ्क) क्रमशः शीर्ष तीन स्थानमा रहे ।
पुरुष कुन्सु ताउ सुमा आर्मीका विश्व बुढा मगर पहिलो, मध्यपश्चिमाञ्चलका राजिव तामाङ दोश्रो र मध्यमाञ्चलका राजु लामा तेश्रो भए । उनीहरुले क्रमशः १७.६०, १६.६० र १६.३० अङ्क जोडे । महिला चेन सु छियाङ सुमा आर्मीकी ओशिन राई १६.७५ अंकसहित पहिलो भइन् । एपीएफकी कविता थापा मगर (१६.२०) दोश्रो र पूर्वाञ्चलकी मनीषा ठटाल (१०.६५) तेश्रो बने ।
सान्सौंतर्फ पुरुष ४८ केजीमा एपीएफका अशोक खालिङ पहिलो भए । उनले फाइनलमा पूर्वाञ्चलका गणेशकुमार लिम्बूलाई पराजित गरे । ५२ केजीमा मध्यमाञ्चलका कान्ति लामा तथा ५६ केजीमा एपीएफका अमर सुनारले स्वर्ण चुमे । फाइनलमा कान्तिले आर्मीका मदनकुमार श्रेष्ठ र अमरले प्रहरीका पदमबहादुर ठकुल्लालाई हराए ।
६० केजीमा एपीएफका मंगलप्रसाद थारुले फाइनलमा प्रहरीका मुकेश पण्डितको चुनौती समाप्त पार्दै स्वर्ण हात पारे । ६५ केजीमा आर्मीका वीरमान लामा पहिलो भए । उनले प्रहरीका समन घुस्रीलाई फाइनलमा पन्छाए । ७० केजीमा आर्मीका चित्रसिंह ठकुरी र ७५ केजीमा आर्मीकै पदम राई च्याम्पियन बने । उपाधि भिडन्तमा चित्रले पश्चिमाञ्चलका योगेन्द्र थापा तथा पदमले पूर्वाञ्चलका चन्द्र लिम्बूमाथि जित रचे । ८० केजीमा पहिलो भएका एपीएफका निकेश श्रेष्ठले फाइनलमा पश्चिमाञ्चलका अनुप खड्काको चुनौती पन्छाए । ८५ केजीमा एपीएफका भुपेन्द्र शाहले पहिलो स्थान कब्जा गरे । उनले फाइनलमा प्रहरीका अजय महर्जनलाई पराजित गरे । ९० केजीमा आर्मीका किरण साउद र ९० केजीमाथि एपीएफका तेजबहादुर पल्लीले स्वर्ण प्राप्त गरे ।
सान्सौंकै महिला ४८ केजीमा सर्मिला राई र ५२ केजीमा एलिना चौधरी पहिलो बने । आर्मीकाद्वय उनीहरुले क्रमशः पश्चिमाञ्चलकी रेखा बोहरा र सुदूरपश्चिमाञ्चलकी रिता ठकुल्लालाई फाइनलमा हराए ।
५६ केजीमा प्रहरीकी जुनी राईले एपीएफकी निशा विक, ६० केजीमा आर्मीकी लुमन्ती श्रेष्ठले मध्यपश्चिमाञ्चलकी गोमा आफ्रे, ६५ केजीमा एपीएफकी मनीषा राउतले पूर्वाञ्चलकी अस्मिता आप्तेन तथा ७० केजीमा आर्मीकी विन्दु पुन मगरले मध्यपश्चिमाञ्चलकी देवी श्रेष्ठलाई पाखा लगाउँदै पहिलो स्थानमा रहे ।
उसुको समाप्तिसँगै ‘मेरो गौरव, मेरो पौरख, मेरो खेलकुद’ भन्ने नारासाथ पुस ९ गतेबाट सुरु भएको राखेप च्याम्पियनसिपमा समावेश सम्पूर्ण २९ खेलका राष्ट्रिय प्रतियोगिता सम्पन्न भएका छन् । राखेप च्याम्पियनसिपअन्तर्गत यसअघि स्क्वास, भलिबल, सेपाकताक्रो, एथलेटिक्स, बक्सिङ, ह्यान्डबल, तेक्वान्दो, कुस्ती, फेन्सिङ, बास्केटबल, जुडो, टेबलटेनिस, राष्ट्रिय तेक्वान्दो, कबड्डी, सुटिङ, भारोत्तोलन, गल्फ, साइक्लिङ, हक्की, खो खो, आर्चरी, फुटबल, ब्याडमिन्टन र सफ्ट टेनिस उद्घाटन पछि सम्पन्न भएको हो । उद्घाटन अघि प्राविधिक कारणले पौडी, ट्रायथलन, कराते र लनटेनिसको राष्ट्रिय प्रतियोगिता सम्पन्न भएको थियो ।
