धुर्मुस–सुन्तलीले सन्तपुरका विपन्नलाई त हँसाए, तर आफै चाहीं रुँदै फर्किए
रौतहट, २८ माघ : रौतहटको चन्द्रपुर–८ को सन्तपुरमा विपन्न दलित समुदायलाई घर बनाएका हाँस्य कलाकार सीताराम कट्टेल र कुञ्जना घिमिरे (धुर्मुस–सुन्तली) को टाउकोमा ६० लाख ऋण लागेको छ ।
५ करोड ९४ लाख लागतमा एकीकृत नमूना बस्ती निमार्ण गर्दा उनीहरुले सञ्चालन गरेको धुर्मुस–सुन्तली फाउण्डेसनलाई ६० लाख ऋण लागेको छ । माघ २३ गते बाढीपीडितलाई घर हस्तान्तरण गर्दा ७० लाख रकम अपुग भएको थियो । ‘त्यसपछि १० लाख रकम सहयोग जुटेको छ, अझै ६० लाख रुपैयाँ तिर्न बाँकी रहेको छ’–फाउण्डेसनका व्यवस्थापक अर्जुन न्यौपानेले भने ।
बस्ती निमार्णका लागि ल्याइएको सामाग्रीवापतको करिब ६० लाख रकम तिर्न बाँकी रहेको र त्यो रकम सहयोग जुट्नेमा आशावादी रहेको बस्तीका बासिन्दासँग बिदा माग्दै फाउण्डेसनका अध्यक्ष तथा हाँस्य कलाकार धुर्मुसले बताएका छन् । सरसफाइमा विशेष ध्यान दिन, सबैजना मिलेर बस्न, छोराछोरीलाई विद्यालय पठाउन, मदिरालगायत नशालु पदार्थ सेवन नगर्न र बस्तीको हेरचाह गर्न आग्रह गर्दै धुर्मुस सुन्तली रौतहटबाट फर्किएका छन् ।
हास्य कलाकार धुर्मुसले भने ‘बाँकी रहेको रकम चाँडै तिर्नुपर्ने छ, रकम जुट्नेमा विश्वस्त छु । एकसय १५ दिनमा बस्ती हस्तान्तरण गर्न पाएकोमा सबैभन्दा खुशी व्यक्ति गर्दै, असल र सकारात्मक सोच लिएर अघि बढ्दा सबैबाट साथ र सहयोग पाएकाले मानवसेवामा लागिरहने प्रेरणा मिलेको समेत उनीहरुले बताए । बस्तीमा ४७ वटा आवसिय घर, बाल विकास विद्यालय, बाल उधान, सार्वजनिक शौचालय, मन्दिर, भ्यूटावर, खानेपानीको धारा र बाटो निमार्ण गरिएको छ ।
