माओवादी सांसद दास भारतीय भएको दावी गर्दै सपथ नगराउन माग
काठमाण्डौं, ८ फागुन : कांग्रेस नेता तथा पूर्व सांसद रामहरि खतिवडाले सिरहा क्षेत्र नम्बर–२ बाट प्रतिनिधिसभामा विजयी सुरेशचन्द दास भारतीय नागरिक भएको आरोप लगाउँदै सपथ नगराउन माग गरेका छन् ।
उनले दास भारतीय नागरिक भएको भन्दै सपथ ग्रहण नगराउन संसद सचिवालयको ध्यानाकर्षण समेत गराएका छन् । संसद सचिवालय सिंहदरबारमा निवेदन दर्ता गर्दै नेता खतिवडाले माओवादी केन्द्रका तर्फबाट निर्वाचित दास भारतीय नागरिक भएको र बिहारको दरभंगामा उनको स्थायी घर भएको दावी गरेका छन् । नेपालको संविधानको धारा ८७ को १ क मा प्रतिनिधिसभा सदस्य हुन नेपालको नागरिक हुनैपर्ने व्यवस्था छ । संघीय संसदको पहिलो बैठक फागुन २१ गते बस्दैछ ।
