सिंहदरबार गाउँ होइन, सिंहदरबारको भ्रष्टाचार प्रवृति चार्ही गाउँ पुग्यो : बाबुराम भट्टराई
काठमाण्डौं, १४ फागुन : नयाँ शक्ति पार्टी नेपालका संयोजक डा.बाबुराम भट्टराईले सिंहदरबारको गाउँ नगएको बरु सिंहदरबारको भ्रष्टाचारी प्रवृति चाहीं धमाधम गाउँतिर गइरहेको बताएका छन् ।
पार्टीको संघीय परिषदको चौथो बिस्तारित बैठकको तेस्रो दिन शुक्रबार समूह छलफलपछि उठेका जिज्ञासाहरुको शुक्रबार जवाफ दिंदै संयोजक डा. भट्टराईले अहिले संघीयता कार्यान्वयनको नाममा भ्रष्टाचार प्रवृति गाउँसम्म पुगिरहेको आरोप लगाए । ‘हामीले संघर्ष गरेर ल्याएको संघीयताको कार्यान्वयनबाट सिंहदरबारको अधिकार गाउँगाउँसम्म पुग्नुपर्ने हो’, उनले भने, ‘तर, अधिकारभन्दा सिंहदरबारको भ्रष्टाचार गाउँगाउँसम्म पुगिरहेको छ ।’ पूर्व प्रधानमन्त्री समेत रहेका डा.भट्टराईले नयाँ शक्तिले स्थानीय तहबाट हुने भ्रष्टाचार रोक्न छायाँ सरकार चलाउने जानकारी गराउ । उनले समृद्धिको नारा नयाँ शक्तिको भए पनि यसको कार्यान्वयन गर्न सरकारमा पुग्नुपर्ने भएकोले तत्कालको लागि प्रचारात्मकरुपले अभियान लैजानै बताएका छन् ।
उनले नयाँ शक्तिले जितेको ठाउँमा छुट्टै विभाग बनाएर मोडेल काम गर्ने कार्ययोजना ल्याउने बताए। फागुन ९ बाट लुम्बिनीमा सुरु भएको नयाँ शक्तिको संघीय परिषद्को चौथो विस्तारित बैठक शनिबार सम्पन्न हुनेछ । ‘समृद्धि हाम्रो नारा हो तर, हाम्रै नेतृत्वमा कार्यान्वयनको अवस्था अहिले रहेन’, उनले भने, ‘हामी स्थानीय तहमा हुने भ्रष्टाचार रोक्न छायाँ सरकार चलाउने अवधारणामा जान्छौं, र समृद्धिको पक्षमा माहोल बनाउन लागिपर्छौं ।’ बैठकले १५ जनाको विज्ञ परिषद, ३५ जनाको संरक्षक समिति र १०१ जनाको कार्यकारी समिति बनाउने निर्णय गरेको छ ।
