राष्ट्रपतिलाई विवादमा ल्याउने देउवाको प्रयास
काठमाडौं : प्रधानमन्त्री शेरबहादुर देउवाले मन्त्रिपरिषद् विस्तारका लागि राष्ट्रपति कार्यालयमा आज पत्र पठाएका छन् । प्रधानमन्त्री देउवाले निर्वाचन आचारसंहिता विपरीत सरकार विस्तार गरी राष्ट्रपति राष्ट्रपति विद्यादेवी भण्डारीलाई सपथका लागि पत्र पठाएका हुन् ।
प्रधानमन्त्री देउवाको यो पत्रचारसँगै राष्ट्रपति कार्यालय अप्ठ्यारोमा परेको छ । सरकार विस्तार निर्वाचन आचारसंहिताको उल्लंघन हो । तर, प्रधानमन्त्री देउवाले नयाँ मन्त्रीहरुको शपथग्रहणको लागि पत्र पठाएका छन् । निर्वाचन आयोग जस्तो सबैधानिक अंगले यो कामलाई बन्देज लगाएको छ । यसरी सबैधानिक आयोगले नगर्न भनेको काम गर्न पत्रकार गरेर प्रधानमन्त्री देउवाले राष्ट्रपतिलाई विवादमा तान्ने प्रयास गरेका हुन् । मन्त्री परिषद् बिस्तार मात्रै होइन मन्त्रीहरुको शपथ समेत आचार संहिता विपरित हुन्छ ।
राष्ट्रपतिले मन्त्रिमण्डल विस्तारबारे परामर्श गर्ने
यसैबिच राष्ट्रपति विद्यादेवी भण्डारीले प्रधानमन्त्री शेरबहादुर देउवाले राष्ट्रिय प्रजातन्त्र पार्टीका अध्यक्ष कमल थापासहित सांसदहरुलाई आज मन्त्रिपरिषद्मा थप गर्न सिफारिश गरेकाे सन्दर्भमा निर्वाचन आयोग र कानुनविद्सँग परामर्श गर्ने भएकी छिन् ।
प्रतिनिधिसभा र प्रदेशसभाको निर्वाचनको आचारसंहिता जारी भएको स्थितिमा मन्त्रिमण्डल विस्तारबारे निर्वाचन आयोगका प्रमुख आयुक्त, आयुक्तहरु र कानूनविज्ञसँग छलफल गरेर शपथ ग्रहणबारे राष्ट्रपतिले निर्णय गर्ने राष्ट्रपतिको कार्यालयले जनाएको छ ।
आचारसंहिता जारी भएकै अवस्थामा प्रधानमन्त्री देउवाले यसअघि गरेको मन्त्रिमण्डलको विस्तारलाई आचारसंहिता विपरीत भएको आयोगले जनाएको थियो । कतिपय सञ्चारमाध्यममा शनिबार नै नयाँ मन्त्रीहरुको शपथग्रहण कार्यक्रम हुने भनी दिएका समाचारमा सत्यता नभएको राष्ट्रपतिको कार्यालयले स्पष्ट पारेको छ ।