नायिका रेखा थापा जाजरकोटको गाउँमा कलाकार खोज्दै
काठमाडौं, ५ चैत : आफूलाई चलचित्र बाहेक सामाजिक काममा समेत सक्रिय बनाएकी नायिका अहिले जाजरकोटको गाउँमा कलाकार खोज्न निस्किएकी छन् ।
अभिनेत्री रेखा थापा यतिबेला बालबिवाहकाविरुद्ध सशक्त अभिनय गर्न सक्ने एक बालिकाको खोजीमा छिन् । जीवन रुपान्तरणका प्रशिक्षक नरबहादुर कार्कीको अवधारणामा बालबिवाहविरुद्ध सशक्त अभियानको रुपमा निर्माण हुने फिल्मका लागि बालबिवाहबाट वढी प्रभावित जाजरकोटमा थापाले बालिकाको खोजी गरेकी हुन् । रेखाले चलचित्र लाल मस्तिष्क निर्माण गर्ने तयारी गरिरहेकी छन् ।
जाजरकोटवाट चलचित्रका लागि बालपात्र खोज्नुको कारणबारे थापाले भनिन्, ‘जाजरकोटलगायत कर्णाली प्रदेश र नेपालभरी नै बालबिवाहको दर बढी छ र यथार्थमा यसको पीडा भोगिरहेकै बस्तीहरुमा म यो फिल्मको छायांकन गर्न चाहन्छु । छोरीहरुको स्वर्णिम भविष्य निर्माणका लागि यो फिल्मले ठूलो योगदान दिने मेरो विश्वास छ ।’ थापाले यस पटक बालबिवाहलाई मुख्य विषय बनाएर चलचित्र निर्माण गर्न लागेकी छन् । रेखा फिल्मसको व्यानरमा निर्माण हुने चलचित्रको नाम लाल मस्तिष्क राखिएको छ ।
थापा र जीवन रुपान्तरणका प्रशिक्षक नरबहादुर कार्कीले चलचित्र केन्द्रीय पात्र कर्णाली प्रदेशको जाजरकोटमा १५ देखि १७ वर्षसम्मको बालिकाहरुमध्येबाट खोजिरहेका छन् । कार्कीसंग सहकार्य गर्दै छोरीहरुका लागि स्वर्णिम नेपाल महाअभियान चलाइरहेकी थापाले यस पटक बालबिबाहविरुद्ध देशव्यापी अभियान चलाउन लाल मष्तिष्क नामक चलचित्र निर्माण थालेकी हुन । बालबिबाहका कारण विग्रदै गएको नेपाली समाज र महिलाहरुको जीवनको उद्धारको लागि यो चलचित्र बनाउन लागिएको कार्यकारी निर्माता कार्कीले बताएका छन् ।