बागलुङको बलेवा विमानस्थलमा परीक्षण उडान सफल
काठमाडौं: लामो समयदेखि बन्द रहेको जिल्लाको बलेवा विमानस्थलमा सोमवार परीक्षण उडान गरिएको छ ।
आगमी शुक्रबारदेखि नियमित हवाई सेवा सञ्चालन हुन लागेको विमानस्थलमा सोमबार तारा एयरले परीक्षण उडान गरेको हो ।
बागलुङ नगरपालिका–१४ नारायणस्थानमा रहेको विमानस्थलमा नेपाल नागरिक उड्ययन प्राधिकरणले नियमित उडान गर्ने प्रायःजसो तयारी सकिएपछि परीक्षण उडान गरिको हो ।
विमान सञ्चालनमा समस्या छैन
प्राविधिक पक्षको परीक्षण गर्न सोमबार गरिएको उडान सफल भएको र तत्काल विमान सञ्चालनमा समस्या नरहेको पाइलट प्रभाकरप्रसाद घिमिरेले बताए । प्राधिकरणका कर्मचारी र प्राविधिकसहित तारा एयरको १८ सिट क्षमताको ९ एन एकेएल विमान अवतरण हुँदा बलेवा विमानस्थल आसपासमा जम्मा भएका स्थानीय र जिल्ला सदरमुकामबाट पुगेका जनप्रतिनिधिसहितको टोलीले फूलमालासहित स्वागत गरेका थिए । पाइलट घिमिरेका अनुसार विमानस्थल आसपासका केही रुखहरु काटिएको र केही बाँकी नै रहेकाले त्यो पनि केही ठाउँमा आधा भाग काटिएको हुनाले त्यसलाई पुरै काट्नु पर्नेछ ।
उनले विमानस्थल कच्ची भएका कारण रन–वेमा पानी परेको अवस्थामा केही खतरा हुन सक्ने देखिएकाले त्यसलाई कालोपत्रे गरेर कम्तिमा दुई वटा विमान पार्किङ गर्ने स्थल बनाउन आवश्यक रहेको बताए ।
घिमिरेका अनुसार नियमित जहाज सञ्चालनमा आए बलेवादेखि काठमाडौंसम्म ४५ मिनेटमा पुग्न सकिने छ भने पोखरा हवाई मार्गबाट जम्मा ८ मिनेटमा पुगिनेछ । यती र नेपाल एयरलाइन्सका तीन जना पाइलटसँगै नागरिक उडड्यन प्राधिकरणका प्राविधिकसहित ११ जना परीक्षण उडान मार्फत बलेवा पुगेका थिए ।
बिहान ११ बजे पोखराबाट उडेको बिमान ११ बजेर १० मिनेट जाँदा बलेवामा अवतरण गरेको बागलुङ नगरपालिका–१४ नारायणस्थानका वडा अध्यक्ष चक्रबहादुर खत्रीले बताए । पोखरा–बागलुङ राजमार्गको ट्रयाक खुलेपछि २०४८ सालदेखि विमान आउने क्रम रोकिएको सोमबार तारा एयरले परिक्षण उडान गरेको छ ।यो समचार नयाँ पत्रिकाबाट लिएको हौं ।
