विद्यार्थीमाथि छुरा हानेर भाग्नेलाई गोली हानेर समातियो
सुनसरी, ११ बैसाख । धरानमा गोली प्रहार गरी फरार अभियुक्तको समूहलाई प्रहरीले पक्राउ गरेको छ । विद्यार्थीमाथि आक्रमण गर्ने धरान–१५ का कुम्भे भनिने दिपल राई, कुमार लिम्बू र विज्ञान लिम्बूलाई पक्राउ गरिएको इलाका प्रहरी कार्यालय धरानका प्रहरी नायव उपरीक्षक रामेश्वर पौडेलले जानकारी दिएका छन् ।
सादा पोसाकमा खटिएको प्रहरी हवल्दार भीम दाहाल नेतृत्वको टोलीले चारकोसे जङ्गलबाट उनीहरुलाई पक्राउ गरेको हो । चारकोसे जङ्गलमा लुटेरा खोज्दै गएको प्रहरी टोलीमाथि आक्रमण प्रयास गरेपछि प्रहरीले गोली प्रहार गरी पक्राउ गर्न सफल भएको डीएसपी पौडेलले बताए ।
विद्यार्थी आक्रमणमा संलग्न लिम्बे भनिने विकेन लिम्बू भने फरार रहेकाले खोजी भइरहेको पौडेलले बताए । पक्राउ परेका माथि ज्यान मार्ने उद्योग अन्तर्गत मुद्दा चलाइएको छ । सोमबार राति कुम्भेको समूहले पूर्वाञ्चल इञ्जिनियरिङ क्याम्पसमा पढ्दै गरेका विद्यार्थी बाग्लुङ घर भएका सुजन खड्का र काभ्रेपलाञ्चोक घर भएका प्रदीप सापकोटालाई छुरा प्रहार गरेका थिए ।
दुवै विद्यार्थी इञ्जिनियरिङ क्याम्पसमा कम्प्यूटर इन्जिनियरिङ चौथो वर्षमा अध्ययनरत छन् । खड्कालाई बिपी कोइराला स्वास्थ्य विज्ञान प्रतिष्ठानको आईसीयूमा राखेर उपचार भइरहेको छ भने सापकोटाको स्थिति सामान्य छ । धरान–१५ विशाल चोकस्थित साथीको डेराबाट नोटबुक लिएर कलेजको छात्रावासतर्फ फर्कँदै गरेका विद्यार्थीमाथि लुटपाट गर्ने उद्देश्यले आक्रमण गरेको प्रहरीले जनाएको छ ।
