नाट्यकृति ‘आत्मोसर्ग’ सार्वजनिक

---

नयाँ पेज

३० बैशाख २०७५, आईतवार

ललितपुर, ३० वैशाख । अब्राहम समले किबोर्डबाट धुन दिए, प्लकिङबाट राजकुमार समालले गिटार प्रवेश गराए, यम समालले मादल सुरु गरे, सङ्गीतकार मण्डल साम्पाङबाट मुर्चुङ्गा सुनियो र नाकिमा नाकिमले वाचन गरे–
आमा–
तिम्रो श्रद्धामा
ढुङ्ग्रे बासले झुकाएको छ शिर
तिम्रो बिदाइमा
सोचमग्न छ चिउरीको रुख
तिम्रो सम्झनामा
सुसाएको छ सल्लाघारी
तिम्रो पिरमा
धेरै रोएर सुन्निएको छ
आँगन डिलको आँपको आँखा
तिम्रो शोकमा
बेहोस भएको छ
डाँडाको बुडो बर–पिपल
हो आमा,
तिम्रो अनुपस्थितिमा
स्तब्ध छ तुवाचुङ

लगत्तै रेवत राईले गाउन सुरु गरे –
मेरो जीवनको मुहान
मेरो सपनाको बिहान
ओ छिरीबुङ

अलग अभियानको वैशाख शृङ्खलामा कविता र गीत एकसाथ प्रस्तुत गरेर आयोजकले एउटा अलग प्रस्तुति दियो ।

कवि ज्योति जङ्गल र गायिका राधा राईको विशेष प्रस्तुति रहेको शृङ्खलामा साङ्केन बान्तावा, उदिम किराती, इनुमा राई, प्रयास दुमी, शान्ति सिन्जाली लगातले सिर्जना वाचन गरे ।

ज्योति जङ्गलले ‘ताजमहलबाट फर्कदा’, ‘बादशाहको चुम्बन’, ‘घर’, ‘काठमाडौं’, ‘माटालाई ढोग्छु’ र ‘मुस्कानको शरण’ शिर्षकका कविता सुनाइन् भने राधा राईले ‘लेक है बाट’, ‘खोपी राखूँला तिम्रो नाम’, ‘मारिदिए मायाले’, ‘म बाँचेको’ र ‘घिन्ताङमा घिन्ताङ मादलै बज्यो’ बोलको गीत प्रस्तुत गरिन् । दुवै अतिथिले अलग अनुभूति भएको भन्दै अभियान निरन्तरताको शुभेच्छा व्यक्त गरे ।

कार्यक्रमा विष्णु नेम्वाङकृत नाट्यकृति ‘आत्मोसर्ग’ पनि सार्वजनिक गरिएको थियो ।