प्रदेश–३ को नाम ‘नेपाल मण्डल’
भक्तपुर, १३ जेठ । प्रदेश ३ को नाम ‘नेपाल मण्डल’ राख्ने पक्षमा आन्तरिक तयारी भइरहेको सभासदहरुले जनाएका छन् । भक्तपुर जिल्ला मानन्धर युवा संघ घोषणा सभामा सभासद बसन्त मानन्धरले प्रदेश–३ को नामको विषयमा यस्तो जानकारी खुलासा गरेका हुन् ।
नेपाल कम्युनिष्ट पार्टीका केन्द्रीय सदस्य समेत रहेका सभासद मानन्धरले राजधानीलाई हेटौडाबाट अन्यत्रै सर्ने संकेत गर्दै प्रदेश नामाङ्करणको तयारी विषयमा यस्तो पूर्व जानकारी दिएका हुन् । यसको लागि तत्कालीन एमाले पार्टीभित्र पनि प्रदेश–३ को नाम ‘नेपाल मण्डल’ राख्न औपचारिक प्रस्ताव पेश भइसकेको छ ।
लिच्छवी राजा मानदेवभन्दा अघिदेखि नै अहिलेको ३ नम्बर प्रदेश ‘नेपाल मण्डल’ नामले चिनिने पनि उनले बताएका छन् । यो नामले १३ जिल्लाको पहिचान समेत झल्काउने भएर यहि नाम सर्वसम्मत हुने देखिएको उनको दावी छ । स्वयम्भू पूराणको आधारमा पनि प्रदेश ३ अन्तर्गतका जिल्लाहरुलाई ‘नेपाल मण्डल’ नाम राख्दा सम्पूर्ण जिल्लाको पहिचान झल्किन्छ ।
तत्कालीन पृथ्वीनारायण शाहले गोरखा राज्य विस्तार गरी अरु राज्यहरु यसमा गाभिँदा नेपाल मण्डललाई छुट्टै प्रदेश मानेको थियो । भूगोलको सन्दर्भमा पनि प्रदेश नम्बर–३ को नाम ‘नेपाल मण्डल’ उपयुक्त हुने भएर अधिकांश सभासदहरु प्रदेश तीनलाई ‘नेपाल मण्डल’ नाम राख्न सकारात्मक देखिएको उनको बुझाइ छ । घोषणा सभाले न्हुछेरत्न मानन्धरको नेतृत्वमा २१ सदस्यीय नव निर्वाचित पदाधिकारीहरुलाई सार्वजनिक गरेको छ । प्रथम उपाध्यक्ष बाबुकाजी मानन्धर, द्वितीय उपाध्यक्ष रामबहादुर मानन्धर, सचिव ज्ञानेन्द्र मानन्धर, कोषाध्यक्ष वर्तराम मानन्धर तथा अन्य पदाधिकारीहरु छन् ।