अझै शहर केन्द्रित संघीयता, २४३ स्थानीय तहमा छैनन् वाणिज्य बैंक

काठमाडौं, ३० जेठ । सरकारले चालु आर्थिक वर्षभित्र सबै स्थानीय तहमा वाणिज्य बैंकको शाखा पु¥याउने दावी गरिरहेका बेला २४३ स्थानीय तहमा अझै वाणिज्य बैंकको शाखा पुग्न सकेको छैन ।

राष्ट्र बैंकको चालु आर्थिक वर्षको दश महिनाको तथ्याङ्क अनुसार वाणिज्य बैंक, विकास बैंक तथा वित्त कम्पनीका गरी कूल ३ हजार ६७३ शाखा सञ्चालनमा छन् । सञ्चालित अधिकांश शाखाहरु शहर केन्द्रित रहेको पाइएको छ । विकासको दृष्टिकोणबाट समृद्ध र देशको राजधानी समेत रहेको प्रदेश ३ मा सबैभन्दा बढी शाखा छन् । यस प्रदेशमा तीन वटै वर्गका बैंक गरेर कूल १ हजार २६३ शाखा सञ्चालनमा छन् । प्रदेश ३ मा ११९ वटा स्थानीय तह रहेकोमा ९८ वटामा मात्रै वाणिज्य बैंक पुगेको छ भने ३८ वटा तहमा अझै शाखा सञ्चालनमा आउन सकेका छैनन् ।

कर्णाली प्रदेशमा ११३ बैंक तथा वित्तीय संस्थाका शाखा सञ्चालनमा छन् । ७९ वटा स्थानीय तह रहेकोमा ३५ वटामा मात्रै वाणिज्य बैंकका शाखा पुगेका छन् । राष्ट्र बैंकका अनुसार प्रदेश १ मा ५५७ वटा शाखा सञ्चालनमा छन् । १३७ वटा स्थानीय तह रहेको उक्त प्रदेशमा ९४ स्थानीय तहमा मात्र बैंक तथा वित्तीय संस्थाको पहुँच पुगेको छ । ४३ स्थानीय तह अझै वाणिज्य बैंक विहीन रहेको राष्ट्र बैंकको तथ्यांकमा उल्लेख छ ।

प्रदेश २ मा तीन वर्गका गरी ३३२ बैंक तथा वित्तिय संस्थाहरुले सेवा प्रवाह गरिरहेका छन् । त्यस्तै १३६ स्थानीय तहमध्ये ९८ तहमा मात्रै वाणिज्य बैंक पुग्न सकेको छ । ३८ स्थानीय तह वाणिज्य बैंकविहीन छन् । प्रदेश ४ मा ५ सय ५३ वटा बैंक तथा वित्तीय संस्था छन् । यस प्रदेशमा रहेका ८५ स्थानीय तहमध्ये २१ तहमा हालसम्म वाणिज्य बैंकको शाखा खुलेको छैन । प्रदेश ५ मा ६५८ वटा बैंक तथा वित्तीय संस्थाको शाखा सञ्चालनमा छन् । १०९ स्थानीय तह रहेको प्रदेश ५ मा ८५ वटामा वाणिज्य बैंकले आफ्नो शाखा विस्तार गर्न सकेको छ ।
यसैगरी प्रदेश ७ मा बैंक तथा वित्तीय संस्थाहरुको २१५ वटा शाखाहरुले सेवा प्रवाह गरिरहेका छन् । यस प्रदेशमा ८८ वटा स्थानीय तह छन् । जसमध्ये ४४ तहमा वाणिज्य बैंकको शाखा पुगेको छ भने समान ४४ स्थानीय तहमानै वाणिज्य बैंकले शाखा खोल्न सकेको छैन ।

प्रतिक्रिया दिनुहोस्