साविक विजेता जर्मनी मेक्सिकोसँग पराजित
काठमाडौं, ४ असार । विश्वकपको साविक विजेता जर्मनी मेक्सिकोसँग पराजित भएको छ । निक्कै प्रतिस्पर्धात्मक बनेको खेलमा पहिलो गोल जर्मनविरुद्ध मेक्सिकाेले ३४ मिनेटमा गोल गरेको हो ।
रसियाको मस्कोस्थित लुझ्न्की स्टेडियममा आइतबार राति भएको समूह एफ को खेलमा जर्मनीलाई मेक्सिकोले १–० गोल अन्तरले पराजित गरेको हो ।
विश्वविजेतलाई पहिलो खेलमै हार्ने क्रममा खेलको ३५ औँ मिनेटमा जाभियर हर्नान्डेजको पासमा हिरभिङ लोजानोले निर्णायक गोल गरे । सन् २०१४ मा ब्राजिलमा भएको विश्वकपमा अर्जेन्टिनालाई १–० ले हराउँदै उपाधि जितेको जर्मनी यो विश्वकपको पहिलो खेलमा आफैँ १–० ले पराजित भएको हो ।
करिब ६० प्रतिशत बल पोजेसन आफ्नो पक्षमा पारे पनि जर्मनी हार भोग्न बाध्य भयो । खेलका क्रममा जर्मनीले १८ पटक मेक्सिकोको पोस्टमा चार्ज गरेको थियो । त्यसैगरी मेक्सिकोले भने केबल १० पटक मात्रै जर्मनीको पोस्टमा चार्ज गरेको थियो ।
जर्मनीका म्यानुअल नुयोर भन्दा ब्यस्त मेक्सिकोका किपर गुल्लेर्मो ओचोहा थिए । उनले जर्मनीबाट भएका कयौँ प्रहारको उत्कृष्ट बचाउ गरे ।
कडा प्रतिस्पर्धा भएको खेलमा जर्मनीले ९ पटक गोलका सम्भावित प्रहार गरेको थियो भने मेक्सिकोले केबल ४ पटक मात्रै । जर्मनीले निरन्तर आक्रमण गरे पनि मेक्सिकोले काउन्टर एट्याकमा उत्रेर जर्मनीलाई दबाब दिएको थियो ।
जर्मनलीले १६ पटक फ्री किक पाउँदा मेक्सिकोले ११ पटक हान्यो । त्यसैगरी जर्मनीले १७ र मेक्सिकोले २० वटा थ्रोइन्स गरे । जर्मनीले गोलका लागि मेक्सिकोका ३ वटा प्रहार जोगायो भने मेक्सिकोले ९ वटा प्रहार बचायो ।
