गजल : समय हरायो क्यारे !


२० असार २०७५, बुधबार
om prakash ghimire

-ओम प्रकाश घिमिरे

om prakash ghimire

समय हरायो क्यारे, घडी मात्रै छ गाउँमा एक्लै
मानिस बिनाको, झुपडी मात्रै छ गाउँमा एक्लै

प्रतिभा सिर्जना र, नौजवान टिक्दै टिक्दैनन्
बुढा बाको खोपडी, मात्रै छ गाउँमा एक्लै

मोटर चढेर शहर पसे, बेचे सुबिदार बाले घोडा
बियोगमा झुण्डिएको, छडी मात्रै छ गाउँमा एक्लै

घन्किन्न रनबन, गोठाला खेताला, कराउन्न चरीहरु
बर्षादमा उर्लने, भेल बाढी मात्रै छ गाउँ एक्लै

रीति संस्कार परम्परा, सबै सबै शहर पसे
पुर्खाको इतिहासमा, गढी मात्रै छ गाउँमा एक्लै

अवसर र स्वतन्त्रताले, दरबार छोड्न नसकेपछि
बहिनी मरेको, छाउपडी मात्रै छ गाउँमा एक्लै

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७