‘हिमाल आरोहीको फर्जी बीमाबारे सूचना संकललनमै समस्या’
काठमाडौं, २६ असार । हिमाल आरोहण अथवा पदयात्रामा आउने पर्यटकहरूको उद्धार गर्ने क्रममा हुने गरेको फर्जी बीमा दावीबारे छानबिन थालेको सरकार कडा रुपमा प्रस्तुत भए त्यसले पर्यटन व्यवसायमा असर पर्न सक्ने बताएका छन् ।
विगतमा भएका गल्तीमा सरकारको पनि कमजोरी रहेको बताउँदै आगामी दिनमा सरकारले कडा नियम बनाउनुपर्ने उनीहरूको सुझाव छ । सरकारी छानबिन टोलीले गम्भीर विषय भएकोले छानबिनमा समय लाग्ने बताएका छन् । नक्कली रुपमा बिरामीको उद्धार गरी उनीहरूको नाममा बीमा कम्पनीसँग हेलिकप्टरदेखि अस्पताल शुल्क र औषधि उपचारका नाममा मोटो रकमको फर्जी बीमा दावी गर्ने प्रवृत्ति मौलाउन थालेको उजुरी बढेपछि संस्कृति, पर्यटन तथा नागरिक उड्डयन मन्त्रालयले छानबिनमा तीव्रता दिएको हो ।
खुकुलो
तर कतिपय पर्यटन व्यवसायीले चाहिँ यसले पर्यटन क्षेत्रमा नकारात्मक असर पर्नसक्ने भन्दै कारबाही प्रक्रिया खुकुलो बनाउनुपर्ने बताउन थालेका छन् । ट्रेकिङ एजेन्सी अफ नेपालका अध्यक्ष समेत रहेका पर्यटन व्यवसायी नवराज दाहालले आगामी सन् २०२० पर्यटन वर्ष मनाउने तयारी भइरहेको बेला यसले व्यवसायमा असर पर्ने बताउँछन् ।
उनले भने, ‘जसले विगतमा गल्ती गरेका छन् । तिनीहरूलाई गल्ती नगर । अबदेखि मर्यादित व्यवसाय गर भन्नुपर्नेमा बाहिर बढी हल्लाखल्ला गर्नु गलत छ ।’ उनका अनुसार नक्कली उद्धार फस्टाउनुमा सरकारको पनि कमजोरी छ । ‘विगतमा यस्तो व्यवसाय फस्टाउनुमा राज्यले त्यो खालको खुल्लापन दिनु र त्यो खालको छुट दिनुले पनि हो ।’
छानबिन
सरकारले झण्डै दुई दर्जन पर्यटन एजेन्सी, एक दर्जन जति हेलिकप्टर कम्पनी र अस्पतालमा छानबिन गरिरहेको जनाएको छ । तर कतिपयबाट समयमा जवाफ नआएको बताउँदै गम्भीर विषय भएकोले छानबिनमा समय लाग्ने समितिका संयोजक घनश्याम उपाध्यायले बताए ।
उनले भने, ‘विभिन्न निकायबाट सूचना समयमा आइपुगेको छैन । हामी सूचनाहरू संकलन गरिरहेका छौँ र अझ एक दुई महिना यसले समय लिनेछ ।’ यसअघि मन्त्रालयले छानबिन समितिलाई गत असार १५ मा बुझाउन समय तोकेको थियो । हिमाल आरोहण र पदयात्राका लागि विश्वको उत्कृष्ट गन्तव्यमध्येको एक नेपालमा यस्तो गलत काम हुन थालेसँगै पर्यटकको उद्देश्य पूरा नहुने भएको तथा यसले नेपालको छवि अन्तर्राष्ट्रिय रुपमा बिग्रन थालेको बताइन्छ । बीबीसी