नेविसंघ विवाद : सभापतिलाई थाहै नदिई अर्को गुटको महाधिवेशन घोषणा

काठमाडौं, २७ असार । नेपाली कांग्रेसको भ्रातृ संगठन नेपाल विद्यार्थी संघ (नेविसंघ) भित्रको विवाद मिल्नुको सट्टा थप चर्किदै गएको छ ।
सभापति नैनसिंह महरको कार्यशैलीबाट असन्तुष्ट बनेका बहुमत पदाधिकारीहरुले बुधबार सभापतिलाई थाहै नदिई अधिबेशन घोषणा गरेका छन् ।

केन्द्रीय उपाध्यक्ष प्रकाश रानाको अध्यक्षतामा बुधबार बाल्मिकी विद्यापीठमा बसेको बैठकले आगामी साउन २३ देखि २५ गतेसम्म कीर्तिपुरमा १२ औं महाधिबेशन आयोजना गर्ने निर्णय गरेको हो । जम्मा केन्द्रीय सदस्यहरुको ८७ जनाको उपस्थितिमा भएको बैठकबाट अधिबेशन घोषणा गरिएको केन्द्रीय सदस्य अनिलबहादुर शाहीले जानकारी दिएका छन् ।

बैठकले उपाध्यक्ष रामप्रसाद अधिकारीको आयोजकत्वमा एक हजार एक सदस्यीय आयोजक समिति गर्ने निर्णयसमेत गरेको केन्द्रीय सदस्य सुशील भट्टले जानकारी दिए । बैठकबाट महाधिबेशनका लागि भन्दै विभिन्न १३ वटा उपसमितिहरु गठन गरेको छ ।
बैठकमा महामन्त्री कुन्दनराज काफ्ले,उपाध्यक्ष प्रकाश राना, नविन राई, डिल्लीराम सुवेदी र रामप्रसाद अधिकारीको उपस्थिति थियो ।

प्रतिक्रिया दिनुहोस्