फिल्म जुधाएको भन्दै शाहीले गरे ‘चक्कर’ का निर्मातामाथि हातपात
काठमाडौं, ३ असार । निर्माता तथा वितरक गोविन्द शाहीले फिल्म जुधाएको भन्दै ‘चक्कर’ चलचित्रका निर्माता तथा छायाँकार रविन आचार्यमाथि हातपात गरेका छन् ।
आफूले वितरण गर्न लागेको सिनेमा ‘पण्डित बाजेको लौरी’ सँग सिनेमा ‘चक्कर’ जुधाएको भन्दै शाहीले आफूमाथि हातपात गरेको आचार्यले बताएका छन् । घटनापछि नेपाल चलचित्र प्राविधिक संघले एक विज्ञप्ति प्रकाशित गर्दै घटनाको घोर भत्र्सना गर्नुका साथै कानुनी कार्बाहीको माग गरेको छ ।
साउन १ गते दरबारमार्गस्थित वुड ल्याण्ड होटलमा सिनेमा रिलिजको छलफलका क्रममा शाहीले आचार्यमाथि हातपात गरेको आरोप लगाइएको छ । यता शाहीले भने आफूमाथि लागेको आरोप झुटा भएको दावी गरेका छन् । घट्ना भएको समयमा दुई जना मात्रै उपस्थित भएको कारण सत्य के हो त्यो भने बाहिर आएको छैन । घट्ना अनुसन्धान गर्नका लागि सिसिटिभी फुटेज हेर्ने काम भइरहेको जनाइएको छ ।
दुई पक्षको विवादले उग्ररुप लिएपछि यतिबेला निर्माता आचार्य र वितरक गोविन्द शाही दरबारमार्गको प्रहरी चौकीमा छन् । यसअघि पनि सिनेमा ‘किङ’ को कारोबार सम्बन्धमा गोविन्द शाही र निर्माता तथा वितरक गोपालकाजी कायस्थबीच हात हालाहाल भएको थियो । जुन विवाद पनि प्रहरीले मिलाई दिएको थियो ।
