गीत-संगीतमा सम्भावना देखाउँदै ‘सौजन्य’
-राजु ‘यायावर’
काठमाडौं, १७ भदौं । सुनसरी इटहरीका १४ वर्षे सौजन्य पौडेलले गीत गाएको सुन्दा उनको स्वर कुनै व्यावसायिक गायकको भन्दा कम लाग्दैन ।
सांगीतिक क्षेत्रमा निकै सानैमा निकै ठूलो सम्भावना देखाएका सौजन्य अहिले इटहरीका ‘उम्दा’ बाल गायक हुन् । भर्सस्टाइल सिङ्गरको सम्भावना देखाएका सौजन्यको सपना भविष्यमा सफल प्लेब्याक सिङ्गर बन्ने छ । इटहरीको चिल्ड्रेन स्कुलमा कक्षा–९ मा पढ्दै गरेका सौजन्यले आधा दर्जन बढी ‘कभर सङ्ग’ गाएका छन् । उनले गाएका कभर सङ्ग युट्युवमा समेत हेर्न–सुन्न सकिन्छ ।
आफ्नो प्लेब्याक सिङ्गरको सपना पूरा गर्न चार वर्षदेखि शास्त्रीय संगीत सिकिरहेका सौजन्य पढाइ सँगसँगै सांगीतिक करिअरलाई अगाडि बढाइरहेका छन् । सौजन्यको हरेक दिनको कर्म संगीतबाटै शुरु हुन्छ । विहान ५ बजे ओच्छ्यान छोडिसक्ने सौजन्य हात–मुख धोएर हार्मोनिमय समाउँछन् । विहान ५ बजेदेखि ७ बजेको समयमा संगीत कक्षामा सिकेका संगीतका नोट, स्वरको आरोह–अवरोह, राग अलाप्छन् ।
दुई घण्टा हार्मोनियमको पर्दामा स्वर साधना गरेपछि मात्र उनको पढाइलगायत अन्य दैनिकी शुरु हुन्छ । विद्यालय र इटहरीमा आयोजना हुने हरेकजसो सांगीतिक कार्यक्रममा देखिने सौजन्यले अहिलेसम्म सय भन्दा बढी स्टेज कार्यक्रममा आफ्नो गायकी कौशल देखाइसकेका छन् । विशेष गरी सुगम संगीतमा रुची राख्ने सौजन्य आफूलाई भर्सस्टाइल सिङ्गरका रुपमा चिनाउन साधना गरिरहेको सुनाउँछन् ।
उनले स्वर सम्राट स्व. नारायण गोपाल, स्व. गोपाल योञ्जनदेखि अहिलेका चलेका गायकहरुको गीतको कभर सङ्ग गाएका छन् । सौजन्यको स्वर मात्र मन्त्रमुग्ध पार्ने खालको छैन, स्टेज पर्फमेन्स पनि अब्बल गायकहरुको जस्तै लाग्छ । मिठो स्वरका धनी सौजन्यको गायकी हाउभाउ पनि प्रोफेसनल सिङ्गरको जस्तै रहेको उनको विद्यालयका शिक्षकहरु बताउँछन् । पढाइ र गायकीलाई समान रुपमा अगाडि बढाएकै कारण सौजन्य शिक्षक र साथीहरुको प्यारो छन् ।
उसो त सौजन्यको सांगीतिक फड्कोमा परिवारको मुख्य हात छ । किनकी उनको बुबा माधव केसी चलचित्रका नायक हुन् । सांगीतिक क्षेत्रसँगै जोडिएको चलचित्र विधाका बुबा भएकै कारण पनि सौजन्यलाई सांगीतिक क्षेत्रमा लाग्न हौसला र प्रेरणा मिलेको छ । सांगीतिक क्षेत्रको सफलताका लागि पढाइ पनि राम्रो रहनु पर्ने बुझेका सौजन्य पढाइमा वाधा नपुगोस् भनेर हप्तामा तीन दिन मात्र औपचारिक संगीत कक्षा जान्छन् । उनले इटहरीस्थित ओम शिवसती सरगम कला मन्दिरमा गुरु भोला राईबाट गायन कक्षा लिइरहेका छन् ।
बाँकी समय स्वसाधना गर्छन् । उनी गीत गाउने, संगीत सिक्ने मात्र गर्दैनन् बजारमा कस्ता गीत–संगीत चलेका छन्, विदेशी गायक–गायिकाहरुको बारेमा सोसल मिडियाहरुबाट जानकारी समेत लिन्छन् । छोराको प्लेब्याक सिङ्गर बन्ने सपनामा सहयोग पुर्याउन नायक बुबा माधव केसी र अामाले पनि सांगीतिक माहौल वातावरण बनाई दिएका छन् । माधव भन्छन्, ‘मान्छेले आफ्नो रुचीकै विषयमा लाग्दा नै प्रगति गर्छ, उसको रुची गायनमा छन । त्यसैले कुनै रोकावट मबाट छैन । तर, अहिले पढाइलाई नै मुख्य ‘प्रायोरिटी’ राख्नु पर्छ भनेर सम्झाउँछु ।
टिन एजमै इटहरीबासीको खोजीमा रहेका र आँखामा बसेका सौजन्यलाई अहिले चलिरहेको गायक प्रतियोगिता नेपाल आइडल र भ्वास अफ नेपालमा सहभागी हुने ठूलो रहर थियो, तर यी प्रतियोगितामा भाग लिन उनको उमेर वाधक बन्यो । किनकी यो प्रतियोगितामा सहभागी हुन उनको उमेर कच्चा भयो । तर, भविष्यमा यस्ता प्रतियोगिताहरुमा आफूलाई समावेश गराउँदै लैजाने सौजन्य सुनाउँछन् ।