छमछमीको काठमाडौं अडिसन शुरु, को के भन्छन् ?


४ आश्विन २०७५, बिहीबार
top 6 o

काठमाडौं, ४ असोज । ‘नेपाल टेलिभिजन’ को नृत्यमा आधारित पहिलो रियालिटी शो टेलिभिजन कार्यक्रम ‘छमछमी’ नेपाली मौलिक संस्कृतिको संरक्षणमा ध्यान दिएर लोकप्रिय बन्न सफल भएको छ ।

top 6 o
फाइल फोटो

छमछमी नेपाली माटो सुहाउँदो मौलिक नृत्य कार्यक्रम हो । ‘नेपाली मनको, नेपालीपनको’ मौलिक कार्यक्रम छमछमीमा आउने दर्शकको मतको मात्राले पनि यो कार्यक्रमप्रतिको आकर्षणलाई देखाउँछ ।

मेचीदेखि महाकालीसम्म करीब दुई हजार पाँच सय नृत्यप्रेमीले छलछमी–३ सम्म नाचेर गइसकेका छन् । संविधान दिवसका अवसरमा नेपाल टेलिभिजनले आजदेखि ‘छमछमी–४’ को ‘काठमाडौँ अडिसन’ (जाँच) शुरु गरेको छ ।

सञ्चार तथा सूचना प्रविधिमन्त्री गोकुलप्रसाद बास्कोटाले छमछमी–४ को उद्घाटन गर्दै देशको आर्थिक समृद्धिका लागि कला, संस्कृति र सभ्यताले ठूलो सहयोग गर्न सक्ने बताए । मन्त्री बाँस्कोटाले भने, ‘देउडा, तामाङ सेलो, चण्डी नाच, सोरठी आदि हाम्रा मौलिक संस्कृति हुन् ।’

सबल राष्ट्र निर्माणको आधार कला र संस्कृति बन्न सक्ने बताउँदै उनले नेपालका सबै संस्कार र संस्कृतिलाई व्यापक प्रचार प्रसार गरेर त्यसलाई पर्यटनमा रुपान्तरण गर्न सके अर्थाेपार्जन हुनाका साथै संस्कृतिको पनि संरक्षण हुने स्पष्ट गरे । मन्त्री बाँस्कोटाले छमछमी कार्यक्रमले देशमा छरिएर रहेका प्रतिभाहरुको पहिचान तथा कला र संस्कृतिको संरक्षण गर्न मद्दत पुग्ने विश्वास व्यक्त गरे ।

नेपाल टेलिभिजनका अध्यक्ष डा. महेन्द्र विष्टले नेपाली प्रतिभाको प्रष्फुटन गर्ने उद्देश्यले शुरु गरिएको सो कार्यक्रममा नेपालीको मौलिक पहिचान झल्कने तथा मुलुकभित्रका १२५ जातजाति र १२३ भाषाभाषीको वेशभूषा देखिने बताए ।

‘छमछमी’ नृत्य कार्यक्रममा १४ वर्षमाथिका नेपाली नागरिकले भाग लिन पाउने छन् । नेपाल टेलिभिजनको रजत महोत्सवका उपलक्ष्यमा २०६६ सालदेखि सो कार्यक्रमको शुरुआत भएको हो । छमछमी–४ का निर्णायकमा नृत्याङ्गाना मिथिला शर्मा छिन् ।

उनी पहिलो शृङ्खलादेखि नै निर्णायकको भूमिकामा रहेकी छन् । त्यस्तै राष्ट्रियदेखि अन्तर्राष्ट्रियस्तरमा समेत नृत्य मञ्चमा स्थापित महेश गोदार र नेपाली सिने जगतकी नायिका सञ्चिता लुईटेल छन् ।

छमछमी–४ मा २ सय जनाले प्रतिष्पर्धा गर्ने भएका छन् । काठमाडाैंपछि बिर्तामोड, इटहरी, जनकपुर, हेटाँैडा, चितवन, पोखरा, बुटवल, कोहलपुर, सुर्खेत र धनगढी अडिशन हुनेछ । कार्यक्रम प्रस्तोतामा नारायण कडरिया र रोशनी खत्री छन् ।

आगामी कात्तिक ४ गतेदेखि साँझ ८ः५० बजे प्रशारण गरिने छमछमी–४ पनि दर्शकमाझ लोकप्रिय हुने विश्वास आयोजकले गरेको छ । छलछमी सिजन–१ मा झापाकी अजुजा अग्रवाल, छलछमी सिजन–२ मा पूर्वकै साजन तामाङ र छलछमी सिजन–३ मा हेटाँैडाका सरोज प्रजा विजेता बनेका थिए ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७