‘ए’ डिभिजन लिग फुटबल : पहिलो खेल बराबरी
काठमाडौं, २६ असोज । शहीद स्मारक ‘ए’ डिभिजन लिग फुटबल प्रतियोगिताअन्तर्गत आज भएको पहिलो खेलमा हिमालयन शेर्पा क्लब र सशस्त्र प्रहरी बल एपिएफ) क्लबबीचको खेल गोलरहित बराबरीमा सकिएको छ ।
सातदोबाटोस्थित अखिल नेपाल फुटबल संघ (एन्फा) को खेल मैदानमा भएको खेलमा निर्धारित समयसम्म दुवै टोलीले गोल गर्न नसकेपछि दुवैले अंक बाँडेका छन् ।
यस खेलसँगै दुवै टोलीले १-१ अंक जोडेका छन् । खेलमा हिमालयन शेर्पाका आशिष गुरुङ म्यान अफ दि म्याच घोषित भए । सोही मैदानमा आजै हुने दोस्रो खेलमा मनाङ–मस्र्याङ्दी क्लब र ब्रिगेड ब्वाइज भिड्ने छन् । लिगको विजेताले ५० लाख तथा उपविजेताले ३५ लाख प्राप्त गर्नेछन् ।
त्यसैगरी तेस्रोले २५ लाख, चौथोले १५ लाख, पाँचाैंले सात लाख र छैटौँले पाँच लाख पुरस्कार पाउनेछ । फेयर प्ले टोलीले एक लाख तथा प्रत्येक खेल जितेबापत एन्फाले क्लबलाई ५० हजार र म्यान अफ दि म्याच खेलाडीलाई १० हजार पुरस्कार प्रदान गरिने छ ।
