ड्युटीमा रहेका प्रहरीमाथि नै खुकुरी प्रहार
दाङ, ३० कात्तिक । नागरिकको शान्ति सुरक्षामा खटिएका एक प्रहरीमाथि नै सार्वजनिकस्थलमै खुकुरी प्रहार गरिएको छ ।
पश्चिम दाङको शान्तिनगर गाउँपालिका–२ अमुवामा दुई समूहबीचको विवाद मिलाउन गएका इलाका प्रहरी कार्यालय खिलतपुरमा कार्यरत प्रहरी जवान चन्द्रप्रकाश वलीमाथि खुकुरी प्रहार गरिएको छ ।
खुकुरी प्रहारबाट गम्भीर घाइते भएका प्रहरी जवान वलीको टाउकोमा १० वटा टाँका लगाउनुपरेको इलाका प्रहरी कार्यालय खिलतपुरले जानकारी दिएको छ ।
इप्रका खिलतपुरका प्रमुख प्रहरी निरीक्षक डाक्टरप्रसाद चौधरीका अनुसार त्यो घटनामा स्थानीय थप दुई जनामाथि पनि चोट लागेको छ ।
स्थानीय विशाल रोका र नैनबहादुर नेपालीको टाउकोमा सामान्य चोट लागेको हो । त्यसै ठाउँका विशाल रोका र चन्द्रप्रकाश नेपालीको समूहबीच आपसी विवादमा झडप भएको थियो ।
प्रहरीले खुकुरी प्रहार गरेको आरोपमा शान्तिनगर गाउँपालिका २ अमुवाका २५ वर्षका चन्द्रबहादुर नेपाली, २० वर्षका नैनसिङ नेपाली, २२ वर्षका सुकलाल नेपाली र १६ वर्षका वीरबहादुर नेपालीलाई प्रहरीले पक्राउ गरेको छ ।
विवाद भएको सूचनाको आधारमा आफूहरु घटनास्थल पुगेर विवादलाई साम्य पार्ने क्रममा खुकुरी प्रहार भएको प्रहरीले जनाएको छ ।