नेपालमा २ सय, पाँच सय र दुई हजार दरका भारुमाथि प्रतिवन्ध
काठमाडौं, २७ मंसिर : भारु दुई सयका नोट नेपालमा नचल्ने भएको छ। यसअघि भारु पाँच सय र दुई हजारको नोट नेपालमा प्रतिबन्ध लगाइएकोमा २ सयका नोट पनि प्रचलनमा नल्याइने भएको हो ।
विहिबार मन्त्रिपरिषद्को निर्णय सार्वजनिक गर्न आयोजित पत्रकार सम्मेलनमा सञ्चारमन्त्री तथा सरकारका प्रवक्ता गोकुल बाँस्कोटाले यी तीन दरका भारतीय नोटमाथि प्रतिबन्ध लगाएको बताए । मन्त्रिपरिषदको गत सोमबार बसेको बैठकले यी नोटहरुमाथि प्रतिबन्ध लगाएको हो ।
अब भारु २ सय, ५ सय र २ हजारका नोटको कारोबार नेपालमा गैरकानुनी हुनेछ । भारु १ सय वा सोभन्दामुनिका नोटहरु भने चलनचल्तीमा रहनेछ ।
भारतले कालोधनलाई निरुत्साहित गर्न भन्दै पाँच सय र हजारका पुराना नोट विस्थापित गरी नयाँ नोटहरु प्रचलनमा ल्याएको हो । नेपालमा रहेका पुराना नोट सटहीका सम्वन्धमा भारतले चासो दिएको छैन ।