५६ हजार दोलखाबासीले माथिल्लो तामाकोशीको रकम फिर्ता पाउँदै
काठमाडौं, १ पुस । दोलखाका झण्डै ५६ हजार स्थानीयले माथिल्लो तामाकोशीको शेयर बाँडफाँडपछि बढी भएको रकम फिर्ता पाउने भएका छन् ।
लामो समयपछि दोलखावासीले आइतबारदेखि पैसा फिर्ता पाउन थालेका हुन् । माथिल्लो तामाकोशी जलविद्युत आयोजनाको शेयर खरिदका लागि स्थानीयवासीको बढी भएको रकम प्रत्येक बैङ्कबाट आइतबारदेखि वितरण भइरहेको माथिल्लो तामाकोशी जलविद्युत आयोजनाले जनाएको छ ।
सह–निष्काशन तथा बिक्री प्रबन्धकको जिम्मा पाएको सनराइज क्यापिटल लिमिटेडले विभिन्न कारणले फिर्ता रकम नपाएका झण्डै ५६ हजार दोलखालीको नाममा जिल्लाका सम्पूर्ण बैङ्कमा चेक पठाएको हो ।
उक्त चेक शुक्रबार नै सबै बैंकमा पठाइएकोले आइतबारदेखि रकम वितरण शुरु भएको छ । आफ्नो बैंक खातामा अहिलेसम्म पनि फिर्ता रकम नआएको भए दोलखावासीले यसअघि शेयर फारम बुझाएको बैंकमा पुगी रकम लिन सक्ने आयोजनाका प्रवक्ता डाक्टर गणेश न्यौपानेले जानकारी दिएका छन् ।
पैसा फिर्ता लिन शेयर आवेदन फारमको अर्धकट्टी लिई यसअघि फारम बुझाएको बैंकमा जानुपर्नेछ । शेयर बाँडफाँड भएको डेढ महिनासम्म ५६ हजार दोलखावासीले बाँकी रकम फिर्ता पाएका थिएनन् । खाता नम्बर नमिलेको, केवाइसी अपडेट नभएको, नाम नमिलेकोलगायतका कारण लगानीकर्ताले पैसा फिर्ता पाएका थिएनन् । दोलखावासीको शेयर कात्तिक १४ गते बाँडफाँड गरिएको थियो ।