‘डा. केसी आफैं प्रधानमन्त्री भएपनि उनको शतप्रतिशत माग पूरा गर्न सम्भव छैन’
भक्तपुर, ५ माघ : सञ्चार तथा सूचना प्रविधि मन्त्री गोकुल प्रसाद बाँस्कोटाले अनसनरत डा गोविन्द केसीले द्वन्द्वकालका मुद्दा समेत उठाएर भ्रम छर्न खोजेको बताएका छन् ।
तस्बिर :- रमेश गिरी, भक्तपुर, रासस
द्वन्द्वकालका मुद्दा र मेडिकल क्षेत्रबीच कुनै सम्बन्ध नभएपनि डा. के.सीले यस बारेमा जोडेर भ्रम छर्न खोजेको उनको भनाई छ ।
शनिबार नेपाल पत्रकार महासंघ जिल्ला शाखा भक्तपुरको २१ औं साधारणमा कार्यक्रममा बोल्दै मन्त्री बाँस्कोटाले केसीको शतप्रतिशत माग पूरा गर्न उनी आफैं प्रधानमन्त्री भएपनि सम्भव नभएको बताए ।
बाँस्कोटाले सरकारले सबैलाई हेर्ने दृष्टिकोण बराबरी हुने बताउँदै भने ‘सबै जनताको माग पुरा गर्ने दायित्व सरकारको हो, डा केसीको मात्र होइन ।’
अर्को प्रसंगमा उनले सञ्चार जगतले सत्य र तथ्यमा आधारित भएर पत्रकारिता गर्नु पर्नेमा जोड दिए ।
सरकार पत्रकार जगतको हकहितको लागि सदैव तयार रहेको भन्दै उनले न्युनतम पारिश्रमिक कुनै पनि हालतमा लागू हुने बताए ।
कार्यक्रममा नेकपाका सांसद महेश बस्नेतले पत्रकारिता जगतले अब राजनीतिक मुद्धामा भन्दा पनि सम्वृद्धिका विषयमा कलम चलाउनु पर्ने समय आएको बताए ।
सो अवसरमा शुभकामना मन्तब्य दिँदै केन्द्रीय अध्यक्ष गोविन्द आर्चाय, उपाध्यक्ष दीलिप थापामगर, नेकपाका नेता बचन देउजा, कांग्रेसका दूर्लभ थापालगायतले सञ्चार क्षेत्रले सकारात्मक विषयलाई महत्व दिनु पर्ने बताए ।
उक्त अवसरमा पत्रकार महासंघ भक्तपुरले हरेक वर्ष प्रदान गर्दै आएको स्व. मैयाँदेवि शिल्पकार स्मृति पत्रकाररिता पुरस्कार कान्तिपुर टेलिभिजनका पत्रकार नारायण सुन्दर किलम्बुलाई प्रदान गरिएको छ ।
