नेपाललाई सार्क अवार्ड, कुन-कुन बिधामा पायो ?
काठमाडौँ :द सार्क फिल्म अवार्ड २०१७ को विजेता घोषणा भएको छ । द सार्क फिल्म फेस्टिवलले सार्वजनिक गरेको चौध विधाको तीन विधामा नेपालले पनि अवार्ड जितेको हो ।
उत्कृष्ट सम्पादकमा भुपेन्द्र अधिकारीले फिल्म ‘’ डाईङ्ग क्यान्डल’’बाट यो अवार्ड प्राप्त गरेका छन् भने उत्कृष्ट पार्श्व संगीतमा फिल्म ‘’कालो पोथी’’बाट जेसन कुँवरले अवार्ड प्राप्त गरेका हुन् । त्यस्तै, फिल्म ‘’कालो पोथी’’ले उत्कृष्ट फिल्म ओपनको अवार्ड पनि आफ्नो पोल्टामा राख्न सफल भएको छ ।
‘’डाईङ्ग क्यान्डल’’ र ‘’कालो पोथी’’व्यावसायिक सफलतामा पछीपरे पनि समिक्षात्मक र प्रसंशनीय बनेको फिल्म हो । उत्कृष्ट सम्पादकको अवार्ड जित्न सफल भुपेन्द्र अधिकारीले फिल्म ‘’ डाईङ्ग क्यान्डल’’को सम्पादन काठमाडौँमा अवस्थित किन्डल सिने (रेड) स्टुडियोमा गरेका हुन् ।फिल्मको सम्पूर्ण पोष्ट प्रोडक्सनको काम त्यहीँ भएको हो ।
सम्पादक अधिकारीले अहिले सम्म सोलो सम्पादनमा ‘’तुईन’’ र सोलो बाहेक ‘’के म तिम्रो होईन र’’, ‘’प्रेम गीत २’’, निर्भय सम्पादन गरेका छन् । उनि हालै‘’कान्छी’’फिल्मको सम्पादनमा व्यस्त छन् । उनले उत्कृष्ट सम्पादकको अवार्ड प्राप्त गर्न पाउँदा आफुलाई निकै खुशी लागेको बताए । ‘’ भोलिको दिनमा अझै मिहिनेत गर्दै जान यो अवार्डले हौसला प्राप्त भएको छ’’ उनले भने ।आयोजकले सार्वजनिक गरेको विजेताहरुमा भारतले तीन, श्रीलंकाले ४,अफगानिस्तानले २, माल्दिभ्सले १ र बंगलादेशले १ विधाहरुमा अवार्ड प्राप्त गरेको हो ।