पूर्वराजा राजनीतिमा सक्रिय बन्दै गइरहेका बेला राप्रपा (संयुक्त) का अध्यक्ष राणा भन्छन्, ‘अब राजतन्त्र फर्किन्छ’
काठमाडौंं, २९ माघ । पूर्व राजा ज्ञानेन्द्र शाह पूर्वी तराईको राजनीतिक भेटघाटमा सक्रिय भइरहेका बेला राजावादी शक्ति राष्ट्रिय प्रजातन्त्र पार्टी (संयुक्त) का अध्यक्ष पशुपति समशेर राणाले अब देशमा राजतन्त्र फर्किने दावी गरेका छन् ।
मंगलबार राजधानीमा आयोजित एक साक्षात्कार कार्यक्रममा बोल्दै अध्यक्ष राणाले सरकार र प्रमुख प्रतिपक्षी दल दुबै असफल भइसकेको दावी गर्दै भने, अब हाम्रो पालो आयो, राजतन्त्र फर्किन्छ ।’
पूर्व राजा ज्ञानेन्द्र शाह अहिले पूर्वी तराईको भ्रमणको शिलशिलामा सिमरा हुँदै झापा पुगेका छन् । उनले यो भ्रमणमा विभिन्न पूर्व राजावादी शक्तिहरुसँग भेटघाटका कार्यक्रम गर्दै आएका छन् । यस्तै पूर्व राजा ज्ञानेन्द्रले पूर्व राजावादी शक्ति राप्रपालाई एकीकृत गर्नका लागि यसअघि पनि पटक–पटक नेताहरुलाई भेटेर छलफल गर्दै आएका छन् ।
यहि परिप्रेक्ष्यमा आएको राप्रपा संयुक्तका अध्यक्ष पशुपतिन समशेर राणको यो अभिव्यक्तिले राजनीतिक आशंका जन्माएको छ । उनले सरकार र प्रमुख प्रतिपक्षी दल नेपाली कांग्रेस दुवैले जनचाहनालाई बुझ्न नसकेको आरोप लगाउँदै भने, ‘यो एक वर्षमा सरकार पनि असफल र प्रमुख प्रतिपक्षी दल कांग्रेस पनि असफल भयो । दुवै असफल भए । उनीहरुले अवसरको सदुपयोग गर्न सकेनन् ।’
राणाले प्रधानमन्त्री केपी शर्मा ओलीले दुई तिहाईको मौकाको सही सदुपयोग गर्न नसकेको आरोप लगाएका छन् । उनले थपे, ‘उहाँ यो मौका प्रयोग गर्न असफल हुनुभयो । यो एक वर्षमा सरकारले के–के राम्रो काम गर्यो त भनेर पाना–पाना पल्टाई पल्टाई हेर्यौ भने मौका खेर फालेको देखिन्छ । सरकारले यो एक वर्षमा हासिल गरेका उपलब्धी शून्य छ ।’ सरकारले कुटनीतिक रुपमा कुनै पनि सीप तथा क्षमता देखाउन नसकेको पनि उनले आरोप लगाए ।
कार्यक्रममा सत्तारुढ दल नेपाल कम्युनिष्ट पार्टी (नेकपा) का स्थायी समिति सदस्य केशब बडालले सरकारको एक वर्षे कार्यकाल आधारभुत रुपमा सफल भएको दाबी गरेका छन् । उनले भने, ‘अहिले युद्धस्तरमा विकास निर्माणका काम भइरहेको छ । बाटाहरु धमाधम चार लेनबाट ६ लेन, र ६ लेनबाट ८ लेनमा स्तरोन्नती भइरहेका छन् ।’
जनताको घरदैलोमा परिवर्तन नदेखिए विकास निर्माणका कामहरु धमाधम भैरहेको उनको भनाई थियो । उनले भने, ‘म यो बीचमा पूर्व–पश्चिम यात्रामा निक्किएको थिएँ । मैले धुलो उडिरहेको देखें । डोजर चलिरहेको देखें । अब त बल्ल विकास भयो भन्ने मलाई लागेको छ ।’
