धनकुटामा राजेन्द्र VS सुनिल, विचार-संगठनले जित्ला या पैसाले ?


१५ मंसिर २०७४, शुक्रबार
Rajendra Rai and sunil thapa

धनकुटा, १५ मंसिर । विहिबार धनकुटाको महालक्ष्मी नगरपालिकाको जीतपुरमा आयोजित बामगठबन्धनको चुनावी सभामा नेकपा (माओवादी) केन्द्रका पोलिटब्युरो सदस्य तथा धनकुटाका प्रभावाली नेता हेमराज भण्डारी निकै आक्रमक रुपमा प्रस्तुत भए । नेता भण्डारीको निशाना राप्रपा(प्रजातान्त्रिक)को तर्फबाट प्रतिनिधिसभा सदस्यका उम्मेदवार सुनिलबहादुर थापा मात्रै थिएन आफ्नै मतदातासँग पनि थियो ।

Rajendra Rai and sunil thapa

उनले आक्रोशसँगै मतदाताहरुसँग गुनासो र दुःखेसो पोखे । देशैभरी धनकुटेली जनताहरु पैसामा बिक्री भएको सन्देश गएको भन्दै उनले आफ्नै कार्यकर्ता र मतदाताहरुसँग आक्रोश पोखे । भने, ‘धनकुटा दुई नम्बर क्षेत्रको जनताको बारेमा काठमाडौंमा चर्चा हुन्छ । सबै स्थानीय तहमा कम्युनिष्टले जित्ने । तर, वडा सदस्य पनि नजित्ने राप्रपा (प्रजातान्त्रिक) नामको एउटाले चहि पैसाको बिठो बाँढेर केन्द्रमा चुनाव जित्ने । पैसामा बिक्री हुने जनता भनेर देशभैरी हाम्रो बेइजेत भएको छ ।’ नेता भण्डारीले यसपालीको निर्वाचनमा भने धनकुटेली जनताहरुको वेइजत नहुने विश्वास पनि राखे । भने,‘यसपाली चहिँ धनकुटाको बेइजत नगर्नुहोला । हाम्रो शिर उचो बनाउने गरी काम गर्नुहोला ।’ नेता भण्डारीले धनकुटेली जनताहरु पैसामा बिक्री हुन्छ भनेर देशैभरी सन्देश जादा सबैको शिर गिरेको भन्दै जनतालाई त्यसो नगर्न सम्झाए ।

स्थानीय तहमा प्राप्त मतलाई आधार मान्ने हो भने धनकुटाको निर्वाचनको सन्दर्भमा सबैको चिन्ता नेता भण्डारीको जस्तै हो । स्थानीय तहको निर्वाचन, वाम गठबन्धनको संगठन र जनमत हेर्दा धनकुटामा सुनिलबहादुर थापाले जित्ने कुनै आधार छैन । तर, ढुक्क हुने अवस्था पनि छैन । त्रास उही हो, ‘सुनिलबहादुर थापाले भोट किन्न सक्छ । जनता बेचिन सक्छन् ।’ थापा धनकुटा चुनाव लड्न आउनु पनि किन्न सकिन्छ भन्ने आशाले नै हो । उनका प्रतिस्पर्धी नेकपा (एमाले)का धनकुटा अध्यक्ष राजेन्द्र राई हुन् । जो अघिल्लो निर्वाचनमा थापासँग झिनो मतले पराजित भए पनि निरन्तर धनकुटामा नै बसेर खटिरहे । जनताकोबीचमा उनी लोकप्रिय छन् । उनकै नेतृत्वमा नेकपा (एमाले)ले धनकुटाको सबै स्थानीय तहमा जित हासिल गरेको हो ।

अध्यक्ष राईलाई   स्थानीय चुनावपछि एमाले केपी शर्मा ओलीले ‘म्यान अफ दि इलेक्सन’को उपाधि दिएका छन् । उनलाई अध्यक्ष ओली सहित वरिष्ठ नेता माधवकुमार नेपाल, उपाध्यक्ष वामदेब गौतम, उपमहासचिव बिष्णु पौडेल लगायतले मन्त्री बनाउने आश्वसन समेत दिएका छन् । राई समुदायबाट प्रतिनिधिसभा सदस्यमा उठ्ने नेता मध्ये उनी सबैभन्दा सिनियर नेता हुन् । यस कारण पनि उनको मन्त्री बन्ने सम्भावना देखिन्छ ।

ग्रिनकार्ड भर्सेस ‘लोकल’
एमाले अध्यक्ष राई धनकुटामै जन्मेर धनकुटामै संघर्ष गरिरहेका नेता हुन् । २०४६ सालको जनआन्दोलनका चर्चित विद्यार्थी नेता समेत रहेका राई त्यसयता निरन्तर धनकुटामा छन् । पार्टीको बिभिन्न पदमा रहेर उनले काम गरेका छन् । तर, थापा भने बुवाको शक्ति र विरासतमा धनकुटामा आएका हुन् । उनी लामो समय सयुक्त राष्ट्रसंघमा जागिरे थिए । त्यसबेला उनले अमेरिकाको ग्रीनकार्ड लिइसकेका थिए । लालबाबु पण्डित सामान्य प्रशासन मन्त्री छदा निजामति ऐन संशोधन गराएपछि बहालवाला मन्त्रीबारे नयाँ रहस्यहरु बाहिर आएका थियो । त्यसबेला थापासँग अमेरिकाको ग्रीनकार्ड रहेको पुष्टी भएको थियो । नयाँ पत्रिका दैनिकले उनीसँग अमेरिकाको ग्रीनकार्ड रहेको तथ्य सहित समाचार प्रकाशन गरेको थियो ।

 

विचार–संगठन भर्सेस पैसा

दोस्रो संबिधानसभा निर्वाचन हुदै गर्दा धनकुटामा थापाको निकै ठुलै क्रेज थियो । पूर्वप्रधानमन्त्री सूर्यबहादुर थापाको विरासतको जगमा चुनाव लड्न आएका थापाप्रति जनताको अपेक्षा ठुलो थियो । चुनाव जिते । दुई पटक मन्त्री पनि भए । २०७१ सालमा वाणिज्य तथा आपूर्ति मन्त्री बने । हाल उद्योगमन्त्री छन् ।

दुई पटक मन्त्री बनेपनि धनकुटाको लागि उनले उलेख्य त गर्न सकेनन् नै, यसअघि उनले निर्वाचनको बेला जनाएको प्रतिबद्धता समेत पुरा गर्न सकेनन् । थापा मन्त्री भएको बेला उनका कार्यकर्ताहरुले धनकुटाको लागि योजना बोकेर जादा समेत उनले वेवास्ता गरे । यसपछि धेरैले अनुमान गरेका थिए, ‘अब उनी धनकुटा फर्केने योजनामा छैनन् ।’ तर, कार्यकर्ताहरुकै अनुमान विपरित उनी प्रतिनिधिसभा सदस्यको लागि निर्वाचन लड्न धनकुटा आए । हालै सम्पन्न स्थानीय चुनावमा सबै स्थानीय तहका प्रमुख र उपप्रमुखमा नेकपा एमालेले ‘क्लिन स्वीप’ गर्दै गर्दा धनकुटा जिल्लामा राप्रपाले वडाध्यक्ष मात्र होइन, सदस्य पनि जित्न सकेन ।

जिल्लाका ३ नगरपालिका सहित सबै सात स्थानीय तह जितेर एमालेले धनकुटा जिल्लामा क्लिन स्वीप गरेको थियो । वडाध्यक्षमा पाएको मत हिसाव गर्दा राप्रपाको ४ हजार ३७८ छ भने एमालेको मत २६ हजार ६२१ । वाम गठबन्धनमा सामेल माओवादीको मत ११ हजार ९०६ छ भने राप्रपा प्रजातान्त्रिकलाई समर्थन गरेको कांग्रेसको १५ हजार २८८ मत छ । दलको मात्रै बेग्लाबेग्लै हिसाव गर्ने हो भने ४३ सय मत लिएर राप्रपा प्रजातान्त्रिकका मन्त्री थापा २६ हजार मत बोकेका एमाले नेता राईसँग भिड्दैछ । गठबन्धनका आधारमा भन्ने हो भने साढे १९ हजार मत र साढे ३८ हजार मत वीच प्रतिस्पर्धा हुँदैछ धनकुटामा ।

यस्तो अवस्थामा पनि थापा धनकुटा चुनाव लड्न आएपछि उनका कार्यकर्ताहरुले थापालाई चुनाव जित्न नसकिने बताएका थिए । राप्रपा प्रजातान्त्रिकका एक जिल्ला नेताका अनुसार थापाले चुनाव जित्न अरुबेला होइन चुनावको बेला काम गरे पुग्ने दाबी प्रस्तुत गरेका थिए । ती नेताका अनुसार राप्रपा प्रजातान्त्रिकको एक कार्यकर्ता भेलामा उनले भनेका थिए,‘चुनाव जित्नलाई सधैं आएर काम गर्ने अथवा बिकास गर्ने होइन । चुनावको बेला पैसा बाढ्ने हो । त्यति गरे पुग्छ ।’ ती नेताका अनुसार जनता किनेरै चुनाव जित्न सकिने उनको एकोहोरो दाबी थियो । उनले भेलामा भनेका थिए,‘यहाँको मान्छेलाई बिकास र समृद्धिको कुरा गर्ने होइन चुनावमा दुईचार पैसाको कुरा गर्ने हो । बरु कहाँ कसरी बाढ्ने त्यो पत्ता लगाउनुहोस् ।’

‘धनकुटेली जनताको अपमान’
यता वामगठबन्धनका नेताहरुले भने सुनिलबहादुर थापासँग कुनै प्रतिस्पर्धा नरहेको दाबी गर्छन् । पैसाले किनेर जित्छु भन्नु सचेत धनकुटेली जनताहरुको अपमान भएको एमाले नेता अर्जुन राई बताउँछन् । राई भन्छन्, ‘चेतनाको हिसाबले धनकुटा प्रदेश नम्बर एकलाई नै उज्यालो देखाउने जिल्ला हो । यहाँका जनताहरुलाई किन्छु भन्नु धनकुटेली जनताहरुको अपमान हो । पैसाले सचेत धनकुटेली जनताहरुको अपमान गर्न सक्ने छैनन् ।’

धनकुटामा वाम गठबन्धनका उम्मेदवारहरुलाई जिताउन नेकपा (माओवादी) केन्द्रका नेताहरु पनि सक्रियताको साथ जुटिरहेका छन् । पूर्व सभासद् समेत रहेका नेता भण्डारी वाम गठबन्धनका उम्मेदवारहरुलाई जिताउन फिल्डमै सक्रिय छन् । त्यसो त माओवादी केन्द्रका नेता जिल्ला ईन्चार्ज उज्वल किराती नै चुनाव परिचालनको कमान्डर छन् ।

 

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७