दोस्रो हनिमुनको तस्विरले रजनीकान्तकी छोरी भाइरलसँगै ट्रोलको शिकार
काठमाडौं, ५ फागुन । चर्चित अभिनेता रजनीकान्तकी छोरी सौन्दर्या रजनीकान्तले ११ फेब्रुअरीमा विशगन वंगामुडीसँग विवाह गरिन् । अहिले उनी हनिमुनमा छिन् र उनले श्रीमानसँगको हनिमुनको तस्बिर सोसल मिडियामा सार्वजनिक गरेकी छिन् ।
हिउँले ढाकिएको ब्याकग्राउन्डसहितको तस्बिर निकै राम्रो छ तर, यी तस्बिर काश्मिरस्थित पुलवामा हमलापछि पोष्ट गर्नु र मृतक जवानका लागि शोक प्रकट नगर्नु सौन्दर्याका लागि भारी भयो ।
सौन्दर्यालाई यसका लागि सोसल मिडियामा ट्रोल गरियो । एक प्रयोगकर्ताले सोसल मिडियामा लेखे, ‘कम्तीमा दुई दिनका लागि रोकिऊ । तपाईंहरु दुई जना रमाइलो गर्न सक्नुहुन्छ तर पोष्ट नगर्नुहोस् म्याडम । धन्यवाद… कारण सायद तपाईंलाई थाहा होला ।’
एक अन्य प्रयोगकर्ताले सौन्दर्याको पोष्टमा कमेन्ट गरे, ‘तपाईं रमाइलो गर्नुहोस् तर काश्मिरमा मारिएका जवानप्रति सहानुभूति पनि व्यक्त गर्नुहोस् ।’
केही प्रयोगकर्ताले सौन्दर्याले दोस्रो विवाह गरेर हनिमुन गएकोमा ट्रोल गरेका छन् । जवानको मृत्युमा सौन्दर्याले केही पनि पोष्ट नगरेकोमा एक प्रयोगकर्ताले लेखे, ‘पूरा देश रगतको आँशु रोइरहेको छ र तपाईं यस्तो तस्बिर पोष्ट गरिरहनु भएको छ ।’
ट्रोलपछि एक दिन सौन्दर्याले आफ्नो ट्वीटर ह्यान्डलबाट एउटा तस्बिर पोष्ट गर्दै शहीद भएका जवानलाई श्रद्धाञ्जली दिएकी छिन् । सौन्दर्या रजनीकान्तले ११ फेब्रुअरीमा विशिगन वंगामुडीसँग विवाह गरेकी हुन् । यो सौन्दर्याको दोस्रो विवाह हो । सौन्दर्याका एउटा छोरा पनि छन् । एजेन्सी
