पहिलो नम्बरमा मलाई ‘मार्न’ विप्लवले टोली खटाएको जानकारी मिलेको छ : प्रचण्ड
‘प्रचण्डको नक्कल गरेर वास्तविक प्रचण्ड हुन सकिंदैन’
काठमाडौं, ३० फागुन । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले विप्लव समूह नक्कल, षड्यन्त्र र नाटक गरेर परीक्षामा पास नहुने बताएका छन् ।
वाइसिएल नेपालले पेरिसडाँडामा आज आयोजना गरेको ‘शहीद तथा बेपत्ता परिवार अभिनन्दन’ कार्यक्रममा उनले भने, ‘कुनै पनि आन्दोलनलाई सफल बनाउन त्यो समय, अवस्था तथा आवश्यकताअनुसारको सक्कलताबाट मात्रै सफल हुन्छ ।’
पूर्व प्रधानमन्त्री समेत रहेका अध्यक्ष प्रचण्डले विप्लवलाई सङ्केत गर्दै कसैको नक्कल गर्दै धाँकधम्की दिंदै आफ्नो अधिपत्य देखाउँछु भन्ने कसैलाई सपना नदेख्न चेतावनी दिए । पार्टी एकीकरणबाट बलिदानको कीर्तिमानीलाई स्थापना गर्न सफल भएको बताउँदै उनले जनताको काम गर्दै जाँदा जनताले प्रचण्ड बनाएको बताए , उनले भने, ‘प्रचण्डको नक्कल गरेर वास्तविक प्रचण्ड हुन सकिंदैन ।’
अध्यक्ष ‘प्रचण्ड’ ले विप्लवलाई लक्षित गर्दै भने, ‘निधार खुम्च्याएर सोच्नुपर्छ, निरङ्कुशतामा लान सकिँदैन ।’ उनले देशमा शान्ति, अमनचयनलाई बिथोल्न खोजे जोकोहीलाई राज्यले संविधान तथा ऐन कानूनअनुसार कार्वाही गर्छ, त्यसैले परिस्थितिअनुसार अघि बढ्नुपर्नेमा जोड दिए ।
आफूलाई नै १ नम्बर मा मार्न विप्लव समूहले निर्णय गरी टिम खटाएको जानकारी सरकारबाट प्राप्त भएको उल्लेख गर्दै अध्यक्ष प्रचण्डले आफू कसैको धम्कीबाट विचलित नहुने समेत बताए । उनले जनताको त्याग र बलिदानीबाट नै समाजवादको आधार तयार भएको बताउँदै समाजवादको यात्रामा अघि बढेको तर त्यो रातारात आउन नसक्ने धारणा व्यक्त गरे । एकता र सहकार्यका साथ महान् समाजवादको उज्यालोमा पुग्न सकिने पनि उनले बताए ।
अध्यक्ष प्रचण्डले शहीदहरु युग युग बाँचेका हुन्छन् भन्दै जनयुद्ध र जनआन्दोलनका सबै शहीदको एकै ठाउँमा शहीदपार्क बनाउनेमा पार्टीमा सहमति भइसकेको जानकारी गराए । तल्लो तहसम्म पार्टी एकीकरणको अन्तिम रुपमा केही दिनमा नै हुने समेत जानकारी गराए ।
