क्रिस्टियानो रोनाल्डोविरुद्ध अश्लिलताको मुद्दा
काठमाडौं, ३ चैत । स्पेनिस क्लब एट्लेटिको म्याड्रिडले इटालियन क्लब युभेन्टसका सुपर स्टार क्रिस्टियानो रोनाल्डोविरुद्ध युरोपियन च्याम्पियन्स लिग फुटबलको आयोजक संस्था युइएफएमा उजुरी दिएको छ ।
च्याम्पियन्स लिग अन्तर्गत गत बुधबार अन्तिम १६ को दोस्रो लेगमा गोलपछि रोनाल्डोले ‘खराब सेलिब्रेसन’ गरेर आफ्ना समर्थकको अपमान गरेको भन्दै एट्लेटिकोले तीन दिनपछि रोनाल्डोविरुद्ध मुद्दा हालेको हो । एट्लेटिकोले पोर्चुगिज रोनाल्डोविरुद्ध लिखित रुपमा छानबिन तथा कार्बाहीको माग गरेको छ ।
युभेन्टसको घरमा बुधबार भएको खेलमा युभेन्टसलाई शानदार जित दिलाउन रोनाल्डोले सनसनीपूर्ण प्रदर्शन गर्दै ह्याट्रिक पूरा गरेका थिए । पहिलो लेग २–० गोलले हारे पनि दोस्रो लेगमा युभेन्टसले ३–० गोलको जित निकाल्दै क्वार्टरफाइनलमा स्थान बनाएको थियो । एट्लेटिको च्याम्पियन्स लिगबाट बाहिरिएको थियो ।
युभेन्टसलाई संकटपूर्ण अवस्थाबाट कमब्याक जित दिलाउन निर्णायक भूमिका खेलेका रोनाल्डोले दोस्रो गोलपछि दुई हात गोप्य अङ्गतर्फ लगेर अश्लील सेलिब्रेसन गरेका थिए । अघिल्लो लेगमा एट्लेटिको म्याड्रिडको घरमा युभेन्टसविरुद्ध दोस्रो गोल गरेपछि टोलीका प्रशिक्षक डिएगो सिमोनीले पनि रोनाल्डोको जस्तै सेलिब्रेसन गरेका थिए ।
सिमोनीले आफ्नै घरेलु दर्शकप्रति इंगित गर्दै त्यस्तो सेलिब्रेसन गरेका थिए । रोनाल्डोले भने युभेन्टसको घरमा एट्लेटिकोको पाहुना दर्शकतिर फर्किएर सेलिब्रेसन गरेका थिए । यसबाट पाहुना समर्थकको अपमान भएको एट्लेटिकोले आफ्नो उजुरीमा दाबी गरेको छ ।
२–० को अवस्था उल्टाएर ३–२ को जित दिलाएपछि रोनाल्डोले आफ्नो घरमा एट्लेटिकोका प्रशिक्षकलाई जवाफ दिन उनकै स्टाइलमा त्यस्तो सेलिब्रेसन गरेका थिए । प्रशिक्षक सिमोनीलाई सेलिब्रेसन गरेको विषयमा युइएफएले १७ हजार युरो जरिवामा गरिसकेको छ ।
युइएफएको अनुशासन समितिले रोनाल्डोलाई दोषी ठहर गरेमा उनीमाथि कम्तीमा एक देखि बढीमा तीन खेलसम्म प्रतिबन्ध हुनेछ । प्रतिबन्ध नभए आर्थिक जरिवाना हुन सक्ेछ । एजेन्सी
