मनाङ जिल्ला : प्रतिनिधिसभामा एमाले, प्रदेशमा काँग्रेस र स्वतन्त्र निर्वाचित


प्रकाशित मिति : December 8, 2017

काठमाडाैं :  हिमालपारिको जिल्ला भनिने मनाङमा प्रतिनिधिसभामा नेकपा (एमाले) र प्रदेशसभामा नेपाली काँग्रेस र स्वतन्त्र उम्मेदवार निर्वाचित भएका छन् ।  प्रतिनिधिसभा सदस्यका लागि एक मात्र निर्वाचन क्षेत्र भएको मनाङमा नेकपा (एमाले)का उम्मेदवार पोल्देन छेपाङ गुरुङ निर्वाचित भएका हुन् ।
नेका मनाङका सभापति एवं पूर्वराज्यमन्त्रीसमेत रहेकाे नेका उम्मेदवार टेकबहादुर गुरुङलाई २८९ मतले उछिन्दै एमाले उम्मेदवार पोल्देन छोपाङ गुरुङ निर्वाचित भएकाे हाे । विजयी पोल्देन छोपाङले दुई हजार ३०० मत प्राप्त गर्नुभयो भने प्रतिद्वन्द्वी टेकबहादुरले दुई हजार २१ मत पाए ।
खसेको मतमध्ये चार हजार ३२१ मत सदर भयो भने १६ मत बदर भएको छ । नेपालमै सबैभन्दा कम मतदाता रहेको मनाङमा चार हजार ३३८ मत खसेको निर्वाचन कार्यालयले जनाएको छ । यहाँ पाँच हजार ८८१ मतदाता छन् ।
प्रदेशसभा (क)मा काँग्रेस र (ख)मा स्वतन्त्रका मनाङ्गे
प्रदेशसभाका सदस्यका लागि नेपाली काँग्रेसले हिमाली जिल्ला मनाङबाट खाता खोलेको छ । काँग्रेस उम्मेदवार चिन्तबहादुर घलेले प्रदेशसभा (क)बाट एमालेका धोर्जे डण्डुल गुरुङलाई १०२ मतअन्तरले पराजित गर्दै विजयी भएका छन् । विजयी घलेले ९९८ मत प्राप्त गरे ।

एमालेका धोर्जे डण्डुल गुरुङले ८९६ मत प्राप्त गर्नुभएको छ । मनाङ (क)मा दुई हजार १७९ मतदाता रहेकामा एक हजार ९०१ खसेको थियो ।
प्रदेश सभा (ख)मा दीपक मनाङ्गे भनेर चिनिने स्वतन्त्र उम्मेदवार राजीव गुरुङ निर्वाचित  भएको छ । गुरुङले एक हजार ४१० मत पाएकाे छ भने प्रतिद्वन्द्वी नेकाका कर्म गुरुङ ३९० मतले पराजित  भए  । उहाँले एक हजार २० मत प्राप्त गरे ।
एमाले उम्मेदवार खाण्डा लामा गुरुङले उम्मेदवारी फिर्ता लिँदै राजीव गुरुङलाई समर्थन जनाएकाे थियाे ।  जिल्लाबाट एमालेले मनाङ्गेलाई सर्वसम्मत सिफारिश गरेपनि सर्वत्र विरोध हुन थालेपछि एमाले केन्द्रीय कमिटीले उनको नाम हटाएर खाण्डालाई आधिकारिक उम्मेदवार बनाएको थियो । मनाङ्गेले स्वतन्त्र उम्मेदवारी दिएको थियो ।

प्रतिक्रिया दिनुहोस्