‘अनुत्तीर्ण’ अस्थायी शिक्षकहरु फेरि आन्दोलनमा, राखे यस्ता माग
काठमाडौं, १० बैसाख । स्थायी गराउन लिइएको परीक्षामा अनुत्तीर्ण शिक्षकहरुले सरकारसँग विभिन्न माग राख्दै फेरि आन्दोलन थालेका छन् ।
अस्थायी शिक्षकहरुले आफूहरुका माग सम्बोधन गर्ने गरी संघीय शिक्षा ऐन बनाउन माग गरेका छन् । अस्थायी शिक्षक केन्द्रीय संघर्ष समितिले मंगलबार काठमाडौंमा पत्रकार सम्मेलन गरी ऐनमार्फत् फेरि आन्तरिक प्रतिष्पर्धा गराई आफूहरुका माग सम्बोधन गर्नुपर्ने माग अघि सारेका छन् ।
सरकारले अस्थायी शिक्षकहरुका माग सम्बोधन गर्न चासो नदिएको र अवैज्ञानिक तरिकाले परीक्षा लिएर आफूहरुलाई हटाउन खोजेको उनीहरुको आरोप छ ।
सरकारले देशभरका २६ हजार अस्थायी शिक्षकहरुलाई स्थायी बनाउन गत असारमा परीक्षा लिएको थियो । जसमा १३ हजार शिक्षक अनुत्तीर्ण भएका थिए । अहिले तिनै शिक्षक आन्दोलनमा उत्रिएका हुन् ।