गोरखा दरबार पुनर्निर्माण सुस्त भएको भन्दै सभामुख महराले भने, ‘पुनर्निर्माण ढिलो हुँदा पर्यटक प्रभावित हुन्छ’


१३ बैशाख २०७६, शुक्रबार
gorkha

गोरखा, १३ बैसाख । सभामुख कृष्णबहादुर महराले गोरखा दरबारको पुनर्निर्माणमा ढिलाइ नगर्न आग्रह गरेका छन् । भूकम्पपछि गोरखा दरबारकोे पुनर्र्निर्माणको अवस्था बुझ्न आज विहान त्यहाँ पुगेका सभामुख महराले पुनर्निर्माणको काम सुस्त भएको भन्दै त्यसमा तीव्रता दिन सम्बन्धित सबैलाई आग्रह गरे ।

‘दरबारको पुनर्निर्माणको काम अन्यन्तै सुस्त गतिमा भइरहेको देखियो,’ उनले भने, ‘पुनर्निर्माणमा ढिलाइ हुँदा यहाँ आउने आन्तरिक तथा बाह्य पर्यटक समेत प्रभावित हुनसक्छन्, त्यसैले यसको पुनर्निर्माणमा तत्काल गर्नु आवश्यक छ ।’

उनले नेपालको इतिहासलाई जीवन्त बनाईराख्ने गोरखा दरबारको ऐतिहासिक महत्व धेरै रहेको उल्लेख गर्दै पुनर्निर्माण गर्दा दरबारको मौलिक संरचना कति पनि नबिग्रने गरी गर्नुपर्नेमा जोड दिए ।

‘दरबारको संरक्षण, सम्वर्धनन र प्रवर्धननमा तीन वटै तहका सरकार, स्थानीय समुदाय र सरोकारवाला निकाय सबैको चिन्ता र चासो हुनु आवश्यक छ,’ सभामुख महराले भने, ‘गोरखा दरबारलाई ऐतिहासिक, पुरातात्विक र पर्यटकीय गन्तव्यका रुपमा विकास गरी आन्तरिक तथा बाह्य पर्यटक भित्र्याउन सक्यौँ भने गोरखाको आर्थिक विकासमा यसले महत्वपूर्ण भूमिका खेल्न सक्छ ।’

सभामुख महराले आजै गोरखा जिल्लाको ऐतिहासिक महत्व बोकेको गोरखा दरबार सङ्ग्रहालयको समेत अवलोकन गरे । गोरखा दरबारभित्र रहेका विभिन्न ऐतिहासिक कक्ष, नेपाल एकीकरणमा प्रयोग गरिएका हातहतियार, परम्परागत सामग्री तथा विभिन्न जातजाति र समुदायको पहिचान एवम् कला संस्कृति झल्काउने खालका डमीको समेत उनले अवलोकन गरेको गोरखा दरबार हेरचाह अड्डाका सूचना अधिकारी रामेश्वर कट्टेलले जानकारी दिए ।

सभामुख महराका साथमा प्रतिनिधिसभा, शिक्षा तथा स्वास्थ्य समितिका सभापति जयपुरी घर्ती, प्रतिनिधिसभा सदस्य हरिराज अधिकारी, पूर्व संविधानसभा सदस्य कृष्ण धिताल, गोरखा जिल्लाका प्रमुख जिल्ला अधिकारी गजेन्द्रबहादुर श्रेष्ठलगायत सहभागी थिए ।

गोरखाको बारपाक सुलीकोट गाउँपालिकाको आयोजनामा गोरखा भूकम्पको केन्द्रबिन्दु बारपाकमा हिजो आयोजना भएको चौथो भूकम्प स्मृति दिवसमा सहभागी हुन बुधबार साँझ गोरखा आइपुगेका सभामुख महरा आज गोरखाको तल्लो दरबार र माथिल्लो दरबारको अवलोकन गरी राजधानी फर्किएका छन् ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७