क्यारेबियन प्रिमियर लिगको ‘ड्राफ्ट’ हुँदै, छानिएला चार नेपाली खेलाडी ?
काठमाडौं, ८ जेठ । क्यारेबियन प्रिमियर लिग (सीपीएल) को ड्राफ्ट बुधबार (आज) लन्डनमा आयोजना हुँदैछ । ‘ड्राफ्ट’को सूचीमा सन्दीप लामिछानेसहित चार खेलाडी समावेश रहेका छन् । ड्राफ्ट नेपाली समयअनुसार बुधबार बेलुका ७ : ४५ बजे देखी सुरु हुनेछ ।
गतसाल लिगमा राम्रो प्रदर्शन गरेका आइपिएल तथा बिगबास लिगको समेत अनुभव संगालेका लामिछाने यसवर्ष पनि दोहोरिन सक्छन् । उनले अघिल्लो सिजन उत्कृष्ट प्रदर्शन गर्दै उदीयमान प्रतिभा समेत घोषित भएका थिए । गतवर्ष सन्दीपले सेन्ट किट्स एण्ड नेभिस प्याट्रियट्सबाट खेल्दै ५ खेलमा ७ विकेट लिएका थिए । सन्दीपलाई गतवर्ष प्याट्रियट्सले ५ हजार अमेरिकी डलर अर्थात ५ लाख ४० हजार पारिश्रमीकमा टोलीमा अनुबन्ध गरेको थियो । यसपटक उनको पारिश्रमिकमा पनि वृद्धि हुने बलियो सम्भावना छ ।
सूचीमा रहेका रोहित पौडेल, सोमपाल कामी र दिपेन्द्रसिंह ऐरीका लागि आजको ‘ड्राफ्ट’ महत्वपूर्ण छ । यदी उनीहरुलाई कुनै क्लबले समावेश गरेमा अन्तराष्ट्रिय फ्रेन्चाइज खेल्ने उनीहरुको पहिलो अवसर हुने छ । साथै, अनुभवि र विश्वचर्चित खेलाडीसँगको क्रिकेट अनुभव लिने अवसर पाउनेछन् । यो लिगमा छनोट भएर आफ्नो प्रतिभा देखाउन सके भने उनीहरुका लागि अन्य फेन्चाइज क्रिकेटको ढोकासमेत खुल्ने छ ।
गत साता सार्वजनिक भएको ड्राफ्ट सुचिमा चार नेपाली सहित कुल २० देश बाट ५ सय ३६ खेलाडी रहेका छन् ।
सन्दीप लामिछाने 
साेमपाल कामी 
राेहित पाैडेल 
दिपेन्द्र सिंह एेरी
ड्राफ्टमा आन्द्रे रसेल, राशिद खान, जोफ्रा आर्चर, एलेक्स हेल्स, सकिव अल हसन, जेपी डुमिनि, सुनिल नारायण, साई होप, शिम्रन हिटमायर लगात थुप्रै स्टार खेलाडी रहेका छन् ।
वेष्ट इन्डिजमा हुने प्रतियोगितामा ६ टिमको सहभागिता रहनेछ । यस संस्करणको सीपीएल आगमी जुलाई ११ देखी अगष्ट १६ सम्म वेस्टइन्डिजमा चल्नेछ ।
