अनामनगर विष्फोट : एकको मृत्य, विप्लवको इकाइ सभापति घाइते, यस्ता भेटिए पर्चा
काठमाडौं, १२ जेठ । अनामनगरको घट्टेकुलोस्थित एक घरमा भएको सिलिण्डर ग्याँस विष्फोटमा एक जनाको मृत्यु भएको छ । विष्फोट भएको ठाउँमा विप्लव नेतृत्वको नेपाल कम्युनिष्ट पार्टीको पर्चा भेटिएको छ ।
महानगरीय प्रहरी परिसर टेकुका एसपी अशोक सिंहले दिएको जानकारी अनुसार विष्फोट भएको स्थानमा विप्लवको पार्टीका पर्चा, पम्पलेट फेला परेका छन् । पर्चामा ‘नेपाल बन्द सफल पारौँ’लगायतका नारा लेखिएका छन् ।
अहिले अन्य विष्फोटक सामग्री हुन सक्ने आशंकामा नेपाली सेनाको बम डिस्पोजल टोली घटनास्थलमा पुगेको छ । मृतकको सनाखत हुन सकेको छैन । मृतकको शव क्षत विक्षत भएकाले पहिचान हुन नसकेको एसपी सिंहले जानकारी दिए ।
विष्फोटमा रविन केसी घाइते भएका छन् । घाइते रविन केसी ‘विप्लव’ नेतृत्वको विद्यार्थी संगठनका नेता तथा त्रिचन्द्र कलेजका इकाइ सभापति हुन् । उनको ट्रमा सेन्टरमा उपचार भइरहेको छ ।