सेभिल्ला र आर्सनलका फुटबलर रेयसको दुर्घटनामा मृत्यु
काठमाडौं, १९ जेठ । स्पेनिस क्लब सेभिल्ला तथा इङ्लिस क्लब आर्सनलका पूर्व स्ट्राईकर जोसे एन्टोनियो रेयसको कार दुर्घटनामा परेर ज्यान गएको छ ।
स्पेनिस खेलाडी उनको शनिबार ३५ वर्षको उमेरमै कार दुर्घटना परी निधन भएको हो । रेयसको पूर्व क्लब सेभिल्लाले विज्ञप्ति जारी गर्दै आफ्ना पूर्व खेलाडीको कार दुर्घटनामा निधन भएको उल्लेख गरेको छ ।
रेयसले सेभिल्लाको एकेडेमीबाट फुटबल खेल करिअर शुरु गरेका थिए । हालै मात्र उनले एक्स्ट्रेमाडुरा क्लबसँग सम्झौता गरेका थिए । ‘यो एक ज्यादै दुखदायी खबर हो ।
हाम्रो एकेडेमीबाट उत्पादित जोसे एन्टोनियो रेयसको कार दुर्घटनामा परेर निधन भएको छ । हामी उनको मृत आत्माको चीर शान्तिको कामना गर्छौं,’ सेभिल्लाले जारी गरेको विज्ञप्तिमा भनिएको छ ।
रेयसले आफ्नो खेल करिअरमा २००० देखि २००४ सम्म सेभिल्ला, २००४ देखि २००७ सम्म आर्सनल, २००६ देखि २००७ सम्म रियल म्याड्रिडबाट लोनमा, २००७ देखि २०११ सम्म एट्लेटिको म्याड्रिडबाट खेलेका थिए । उनले सन् २०१२ देखि २०१६ सम्म सेभिल्लाबाटै खेलेका थिए । एजेन्सी