अक्षय कुमारले भने, ‘मलाई अरुसँग तुलना नगर्नुहोस्’
काठमाडौं, ३१ जेठ । बलिउड नायक अक्षय कुमार चलचित्र ‘सूर्यवंशी’ को छायांकनमा व्यस्त छन् । रोहित सेट्टीको निर्देशनमा बनेको यो चलचित्रमा अक्षयको जोडीको रुपमा नायिका कट्रिना कैफ छिन् । अक्षयले यो चलचित्रमा प्रहरी अफिसरको भूमिका निर्वाह गर्दैछन् ।
अहिले बलिउडमा अक्षयको तुलना अर्का नायक अजय देवगणसँग भइरहेको छ । रोहितको निर्देशनमा बनेको चलचित्र ‘सिंघम’ मा अजय देवगण प्रहरी बनेका थिए । उक्त भूमिकालाई दर्शकले धेरै रुचाएका थिए । अहिले पुनः रोहितको निर्देशनमा अक्षय कुमार प्रहरी बनेका छन् । त्यसैले पनि उनीहरुबीच निकै तुलना गरिएको छ ।
अक्षय कुमारले भने आफूलाई अरुसँग तुलना नगर्न अनुरोध गरेका छन् । उनले भनेका छन् ‘अजयले आफ्नो ठाउँमा राम्रो काम गरेका छन् र मैले मेरो ठाउँबाट राम्रो गर्ने कोशिस गरेको छु । त्यसैले एक अर्कामा तुलना नगरीदिनुस् ।’