कोपा अमेरिका : उपाधिको दाबेदार मानिएको अर्जेन्टिना पहिलो खेलमै पराजित
काठमाडौं, १ असार । कोपा अमेरिका २०१९ को उपाधिको दाबेदार मानिएको अर्जेन्टिना आफ्नो पहिलो खेलमा नै पराजित भएको छ ।
नेपाली समय अनुसार आइतबार बिहान भएको समूह ‘बी’ को पहिलो खेलमा कोलम्बियासँग २–० गोल अन्तरले अर्जेन्टिना पराजित भएको हो ।
निकै प्रतिष्पर्धात्मक खेलमा कोलम्बियाले दुवै गोल दोस्रो हाफमा गर्यो । कोलम्बियालाई जित दिलाउनका लागि रोगेर मार्टिनेज र डुभान जापाताले एक–एक गोल गरे । खेलको ७१ औँ मिनेटमा मार्टिनेज गोल गर्दै कोलम्बियालाई अग्रता दिलायो । उनले हामेस रोड्रीग्वेजको लामो पासलाई उत्कृष्ट गोल गरेका थिए ।
वैकल्पिक खेलाडीको रुपमा मैदान प्रवेश गरेका जापाले ८६ औँ मिनेटमा गोल गर्दै अग्रता दोब्बर बनायो । उनले जेफर्सन लेर्माको पासलाई सदुपयोग गर्दै गोल गरे । थप समयमा दुवै टोलीबाट गोल हुन नसक्दा अर्जेन्टिनाले प्रतियोगितामा खराब शुरुवात गर्यो ।
अर्जेन्टिना रहेको समूह बी मा कतार, कोलोम्बिया र पाराग्वे रहेका छन् । अब अर्जेन्टिनाले अर्को खेलमा बुधबार पाराग्वेको सामना गर्नेछ । एजेन्सी
