विश्वकप क्रिकेट : पाकिस्तानमाथि भारतको शानदार जीत
एजेन्सी । इङल्याण्ड र वेल्समा जारी आईसीसी एकदिवसीय विश्वकप क्रिकेटमा भारतले पाकिस्तानमाथि शानदार जित निकालेको छ । आइतबार भएको खेलमा भारले पाकिस्तानलाई ८९ रनले पराजित गरेको हो । यो भारतको लगातार दोस्रो जीत हो ।
युद्धकै रुपमा तुलना गरिएको खेलमा भारतले दिएको ३३७ रनको विशाल लक्ष्य पछ्याएको पाकिस्तानले वर्षाका कारण निर्धारित ४० ओभर र ३०२ रनको लक्ष्य पाएको थियो । उक्त लक्ष्य निर्धारित ४० ओभरमा ६ विकेट गुमाउँदै मात्र २१२ रन बनायो ।
पाकिस्तानका लागि फखर जमानले सार्वाधिक ६२ रनको योगदान गरे । उनले ७५ बलमा ७ चौका र १ छक्का प्रहार गर्दै ६२ रन जोड्न सफल भए । त्यस्तै बाबर आजम ४८ जोडे । उनले ५७ बलमा ३ चौका र १ छक्का प्रहार गरे ।
इमाद वसीमले ४६ रनको योगदान गरे भने शादव खान २० रन जोडे । त्यस्तै कप्तान शरर्फराज अहमिदले १२ रन मात्र जोड्न सफल भए । भारतका लागि हार्दिक पान्ड्या, कुलदीप यादव र विजय शंकरले समान २–२ विकेट लिए ।
त्यसअघि टस हारेर पहिला ब्याटिङको निम्तो पाएको भारतले निर्धारित ५० ओभरमा ५ विकेटको क्षतिमा ३ सय ३६ रन बनायो । भारतका लागि रोहित शर्माले शतकीय पारी खेले । उनले ११३ बल खेल्दै १४ चौका र ३ छक्काको सहयोगमा १४० रन पूरा गरे ।
त्यस्तै कप्तान विराट कोहली र केएल राहुलले अर्धशतकीय पारी खेले । ६५ बल खेलेका कोहलीले ७ चौकाको सहयोगमा ७७ रन बनाए । त्यस्तै ७८ बल खेलेका केएलले ३ चौका र २ छक्काको सहयोगमा ५७ रनको योगदान गर्दै आउट भए ।
भारतका लागि हार्दिक पान्ड्याले २६ रन बनाएर आउट भए । पाकिस्तानका लागि मोहम्मद आमिरले ३ विकेट, वहाब रियाज र हसन अलीले समान १–१ विकेट लिएका थिए । एजेन्सी
