लोकसेवाको कर्मचारी भर्नासम्बन्धी परेका सबै रिटमाथि एकै पटक सुनुवाइ हुने
भर्नासम्बन्धमा विभिन्न तीन वटा मुद्दाका साथै कर्मचारीले पनि मुद्दा हालेकाले सबै मुद्दा एकै ठाउँमा राखेर पेशी चढाउन आज आदेश दिएको हो । न्यायाधीशद्वय हरिकृष्ण कार्की र इश्वर खतिवडाको संयुक्त इजलासले यस्तो आदेश दिएको हो ।
लोकसेवा आयोगले समावेशी सिद्धान्त पालना नगरी विज्ञापन गरेको भन्दै अधिवक्ताहरू जगदेव चौधरी, विकास ठाकुर र राजाराम घिमिरेले छुट्टाछुट्टै रिट निवेदन दायर गरेका थिए । तीन निवेदनमा सर्वाेच्चले कारण देखाऊ आदेश जारी गरेको थियो ।
यस्तै स्थानीय तहमा कार्यरत करार र अस्थायी कर्मचारीका तर्फबाट १२१ जनाले आयोगले स्थानीय तहका लागि खोलिएको विज्ञापन रोक्न माग गर्दै रिट निवेदन दायर गरेका थिए । लोकसेवाले ५५१ स्थानीय तहका लागि विभिन्न पदमा नौं हजार १६१ जनाका लागि विज्ञापन आह्वान गरेको थियो । विज्ञापन आवह्वान भएलगतै भर्ना आह्वान असमावेशी भएको भन्दै विरोध शुरु भएको थियो ।
यसअघिको समाचारमा अन्यथा भएकाले पुनः सच्याएर प्रकाशन गरिएको छ ।
