पौडेल हत्याकोको कडा जवाफ दिने विप्लवको चेतावनी
काठमाडौं, ६ असार । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) ले आफ्नो पार्टीका सर्लाही इञ्चार्ज तथा जनकपुर ब्यूरो सदस्य कुमार पौडेलको कायरतापूर्वक हत्या भएको आरोप लगाएको छ ।
पार्टीका जनकपुर ब्युरो इन्चार्ज अरुणले विज्ञप्तिमार्फत सर्लाहीको लालबन्दी नगरपालिका–१ लखन्ती खोलामा साथी पर्खिरहेका पौडलको गोली हानी हत्या गरिएको आरोप लगाएका छन् ।
विज्ञप्तिमा गैरन्यायिक हत्या भएको भत्र्सना समेत गरिएको छ । प्रधानमन्त्री केपी शर्मा ओली नेतृत्वको सरकारको राज्य आतंक र हत्याको कडा जवाफ दिने समेत विज्ञप्तिमा उल्लेख छ ।
पौडेलप्रति श्रद्धाञ्जली व्यक्त गर्दै पौडेललाई विप्लव समूहले शहीद घोषणा समेत गरेको छ । पौडेलको बिहीबार प्रहरीको गोली लागि मृत्यु भएको थियो । प्रहरीले भने दोहोरो हानाहानका क्रममा उनको मृत्यु भएको दाबी गरेको छ ।
