नेकपाको सचिवालय बैठक जारी : जिम्मेवारी र दस्तावेजका विषयमा छलफल हुँदै
काठमाडौं, ७ असार : सत्तारुढ नेपाल कम्युनिस्ट पार्टी (नेकपा) को सचिवालय बैठक प्रधानमन्त्रीको सरकारी निवास बालुवाटारमा जारी छ । शनिबार अपरान्हबाट जारी बैठकमा नेताहरुको जिम्मेवारी र राजनीतिक दस्तावेजमाथि छलफल गर्ने कार्यसूची छ ।
सचिवालय बैठक अघि अध्यक्षद्धय केपी शर्मा ओली र प्रचण्डबीच बैठकका अजेन्डाको बिषयमा अनौपचारिक छलफल भएको थियो । बैठकमा जिल्ला इञ्चार्ज, सहइञ्चार्जका मापदण्डबारे छलफल हुनेछ ।
यसअघिको बैठकमा वरिष्ठ नेता माधवकुमार नेपाल र अध्यक्ष ओलीबीच मापदण्डको बिषयमा विवाद भएपछि सहमति जुट्न सकेको थिएन ।
ओली निर्वाचित जनप्रतिनिधिलाई जिल्ला इञ्चार्ज वा सहइञ्जार्ज बनाउने पक्षमा छन् भने, वरिष्ठ नेता दोहोरो जिम्मेवारी दिदा काम प्रभावकारी नहुने भन्दै दोहोरो जिम्मेवारीको बिरोधमा छन् ।