झापा शिवसताक्षीको नगरसभा सत्तारुढ नेकपा र नगरकै बहुमत सदस्यले बहिस्कार गर्ने
झापा, ९ असार : शिवसताक्षी नगरपालिका नगरपालिकाको नगर सभा बैठक विवादमा परेको छ । यही १० असार २०७६ हुन लागेको नगरसभा बैठकको प्रमुख अतिथिको बिषयमा मतभेद भएपछि नगरसभा विवादमा परेको हो ।
शिवसताक्षी नगपरपालिकाको नगरसभा तथा आर्थिक वर्ष २०७६/०७७ को नीति कार्यक्रम प्रस्तुत हुने नगरसभाको प्रमुख अतिथिको बिषयमा नगरप्रमुख र बहुमत सदस्यबीच मतभेद भएको छ ।
बैठकमा मेयर चन्द्र कुमार शेर्माले महान्यायाधिवक्ता अग्नी खरेललाई नगरसभाको प्रमुख अतिथि बनाउने प्रस्ताव राखेका थिए । मेयर शेर्माको प्रस्तावलाई उपमेयर भोजकुमारी नेपाल र वडा नम्बर २ का अध्यक्ष कुलबहादुर बस्नेतले मात्रै समर्थन जनाएका थिए । तर, तीन जना बाहेक सबै नगरसभा सदस्यले यस क्षेत्रबाट निर्वाचित एलपी साँवा लिम्बूलाई प्रमुख अतिथि बनाउनुपर्ने अडान राखेका थिए ।
बैठकमा वडा नम्बर १० का अध्यक्ष कर्णबहादुर थापा, वडा नम्बर ८ का अध्यक्ष केहरसिंह बस्नेत लगायत बहुमत सदस्यले भने नगरसभा बैठकमा क्षेत्रबाट निर्वाचित संसदलाई बनाउनुपर्ने भन्दै अडान लिएपछि बैठक विना निर्णय सकिएको थियो । बहुमत सदस्यहरुले भने नगरपालिकाका बिकासमा नगरपालिका र निर्वाचित संसदको समन्वय जरुरी रहेको भन्दै प्रमुख अतिथि पनि सांसद साँवालाई बनाउनुपर्ने तर्क राखेका थिए ।
प्रमुख अतिथि विवाद भएपछि ५ असार २०७६ मा बस्नु पर्ने नियमित बैठक र ८ असारमा नगरसभाको तयारी सम्बन्धमा बस्नुपर्ने बैठक समेत स्थगित भएको छ । नगरसभाले भने प्रमुख अतिथिको बिषयमा निर्णय गर्न सकेको छैन तर मेयर शेर्माले भने अग्नी खरेललाई प्रमुख अतिथिको निम्तो दिइसकेका छन् ।
सत्तारुढ नेकपा र बहुमत सदस्यले बहिस्कारमा
नगरपालिकाको औपचारिक निर्णय विना नै प्रमुख अतिथि खरेललाई बनाउन तयारीपछि नगरपालिकाको सत्तारुढ दल नेपाल कम्युनिष्ट पार्टी (नेकपा) र बहुमत नगरसदस्यले बहिस्कार गर्ने भएका छन् । शिवसताक्षीका मेयर शर्मा सहित बहुमत सदस्यहरु नेकपाबाट निर्वाचित जनप्रतिनिधि हुन् ।
विना निर्णय प्रमुख अतिथि बोलाउन लागिएपछि बहिस्कारको तयारी गरिएको एक वडाध्यक्षले बताए । ‘नगरसभा कुनै व्यक्तिको पुजा पाठ जस्तो होइन यो नगरको कार्यक्रम हो । त्यस कारण नगर बैठकबाट निर्णय गराएर मात्रै कार्यक्रम तय हुनुपर्छ,’ ती अध्यक्षले भने । मेयर शर्मा बैठकमा अल्पमतमा पर्ने भएपछि चोरबाट तिर लागेको उनको आरोप छ ।
नेकपाका नगर अध्यक्ष महेन्द्र भट्टराईले नगरसभा बारेमा मेयर शेर्माले पार्टीसँग कुनै समन्वय र छलफल नगरेको बताए । उनले भने, ‘संस्थागत निर्णयबाट काम होस् भन्ने हाम्रो सुझाव हो । तर, प्रक्रियागत र संस्थागत निर्णयलाई मात्रै पार्टीले मान्छ तर व्यक्तिगत निर्णय हामी मान्दैनौं ।’
विवादको चुरो
महान्यायधिवक्ता खरेलको गृह जिल्ला झापा भए पनि उनी गौरादह–३ का स्थायीबासी हुन् । साँवा भने यहाँका निर्वाचित संघीय सांसद हुन् । स्रोतका अनुसार मेयर शेर्मासँग खरेल नजिक छन् । यही कारण शेर्माले भने खरेललाई प्रमुख अतिथि बनाउन चाहेका छन् । तर, साँवा यस क्षेत्रका जनप्रतिनिधि भएको कारण साँवालाई नै प्रमुख अतिथि बनाउनुपर्ने बहुमत नगर सदस्य र स्थानीय पार्टी कमिटिको अडान रहेको छ ।
महान्यायाधिवक्ता खरेल र साँवा दुबै पूर्व प्रधानमन्त्री ओली निकट हुन् । महान्यायाधिवक्ता खरेल अघिल्लो ओली नेतृत्वको सरकारमा कानुनमन्त्री थिए । तर, कानुनमन्त्री भइसकेका नेता सर्बोच्च अदालतको न्यायाधीशसरहको सरकारी नियुत्ती महान्यायाधिवक्ता पदमा बसेपछि उनको तिव्र आलोचना समेत भएको थियो ।
साँवा संविधानसभाको निर्वाचनमा नेपाली कांग्रेसका केशवकुमार बुढाथोकीसँग २३९ मतको झिनो अन्तरबाट पराजय भएका थिए । तर, ०७४ सालको आम निर्वाचनमा भने ४३ हजार ६ सय मत पाएर विजय भएका थिए । उनले १६ हजार ८ सय मतान्तरले पराजित गरेका थिए ।
यो मतअन्तर प्रदेश नम्बर १ मा प्रधानमन्त्री केपी शर्मा ओलीको पछि हो । स्थानीय पूर्वाधार विकास साझेदारी (संसदीय कोष) बाहेक पनि साँवाले १ अर्बभन्दा बढीको योजना आफ्नो निर्वाचन क्षेत्रमा पारेका छन् ।
